کراچی ( پاک ترک نیوز) کرکٹ کے حلقوں میں سینڈ پیپر اسکینڈل کی بازگشت۔ پاکستان کے سابق فاسٹ باؤلر وسیم اکرم نے بھی معاملے پر خاموشی توڑ دی، کہتے ہیں باؤلرز کو گیند دیکھ کر اندازہ ہوجاتا ہے کہ اس کے ساتھ چھیڑ چھاڑ ہوئی ہے یا نہیں۔وسیم اکرم نے کہا کہ وہ گزشتہ ہفتے سے اس تنازع کے بارے میں سن رہے ہیں، ان کے دوست پیٹ کمنز نے بھی کہا ہے کہ وہ اس معاملے میں ملوث نہیں تھے اور نہ ہی انہیں سینڈ پیپر کے استعمال کا علم تھا۔
وسیم اکرم کے مطابق ممکن ہے کہ ٹیم کو اس وقت معلوم ہی نہ ہو کہ کیا ہورہا ہے، تاہم یہ ان کی ذاتی رائے ہے جو درست بھی ہوسکتی ہے اور غلط بھی۔سابق پاکستانی کپتان کا کہنا تھا کہ بطور باؤلر آپ گیند کا خاص خیال رکھتے ہیں، گیند کی ایک سائیڈ رگڑنے اور پچ پر باؤنس ہونے سے بھی اسکریچز پڑتے ہیں، لیکن سینڈ پیپر سے بننے والے نشانات ان سے بالکل مختلف ہوتے ہیں۔
انہوں نے مزید کہا کہ ایک تجربہ کار باؤلر جب گیند ہاتھ میں لیتا ہے تو اسے اندازہ ہوجاتا ہے کہ گیند کے ساتھ کچھ غلط ہوا ہے۔
یہ بھی پڑھیں: حوثی ملیشیا کا ریاض ایئرپورٹ پر بیلسٹک میزائل حملے کا دعویٰ
وسیم اکرم نے امید ظاہر کی کہ سینڈ پیپر اسکینڈل کا معاملہ جلد حل ہوجائے گا۔
