بیروت (پاک ترک نیوز )عراق کے سابق رکنِ پارلیمنٹ احمد العلوانی لبنان کے دارالحکومت بیروت میں ایک اپارٹمنٹ سے مردہ حالت میں برآمد ہوئے ہیں۔ ابتدائی تحقیقات میں انہیں گلا گھونٹ کر قتل کیے جانے کا شبہ ظاہر کیا گیا ہے، جبکہ واقعے میں ملوث ہونے کے شبہے میں ایک لبنانی شہری کو گرفتار کر لیا گیا ہے۔عرب میڈیا رپورٹس کے مطابق احمد العلوانی کی لاش منگل کی شام بیروت کے علاقے طارق الجدیدہ میں واقع ایک اپارٹمنٹ سے ملی۔ لبنانی حکام نے واقعے کو قتل قرار دیتے ہوئے تحقیقات شروع کر دی ہیں، تاہم سیکیورٹی ذرائع نے ابتدا میں ان کی موت کی حتمی وجہ بتانے سے گریز کیا۔
لبنان کی سرکاری خبر رساں ایجنسی کے مطابق اعلیٰ پراسیکیوٹر جج احمد رامی الحاج خود تحقیقات کی نگرانی کر رہے ہیں، جبکہ واقعے کی تفتیش کی ذمہ داری داخلی سیکیورٹی فورسز کے شعبہ اطلاعات کو سونپی گئی ہے۔دوسری جانب لبنانی عدالتی ذرائع نے خبر رساں ادارے کو بتایا کہ ابتدائی تحقیقات سے ظاہر ہوتا ہے کہ احمد العلوانی کو گلا گھونٹ کر قتل کیا گیا۔ واقعے میں ملوث ہونے کے شبہے میں ایک لبنانی شہری کو حراست میں لے لیا گیا ہے، جبکہ ایک شامی مشتبہ شخص کی تلاش جاری ہے جو تاحال فرار ہے۔
یہ بھی پڑھیں: بانی پی ٹی آئی کا پمز اسپتال میں طبی معائنہ ،واپس جیل منتقل
احمد العلوانی کے دفتر نے سماجی رابطے کی ویب سائٹ پر جاری بیان میں ان کی موت کو ہدف بنا کر کیا گیا قتل اور سنگین غداری پر مبنی جرم قرار دیا ہے۔ بیان میں مطالبہ کیا گیا ہے کہ واقعے کی مکمل اور شفاف تحقیقات کی جائیں اور اس میں ملوث تمام افراد کو قانون کے کٹہرے میں لایا جائے۔
