بھارت افغان سرزمین سے پاکستان کیخلاف جنگ چھیڑ رہا ہے ، شواہد موجود ہیں ، وزیر دفاع

اسلام آباد ( پا ک ترک نیوز) وزیر دفاع خواجہ آصف نے واضح کیا ہے کہ بھارت کابل میں افغان طالبان کی پشت پناہی کر رہا ہے۔
وزیر دفاع خواجہ آصف نے عرب ٹی وی کو انٹرویو میں کہا کہ طالبان بھارت کی پراکسی بنے ہوئے ہیں اور بھارت افغان سرزمین سے پاکستان کیخلاف کم شدت کی جنگ چھیڑ رہا ہے۔
وزیر دفاع کا کہنا تھا کہ بھارت اور افغان طالبان کے درمیان گہرے روابط ہیں ، اس حوالے سے ہمارے پاس شواہد موجود ہیں۔ جب طالبان کے ایک وزیر بھارت میں تھے اس وقت پاکستان اور افغانستان میں جھڑپیں ہوئیں۔
خواجہ آصف نے کہا کہ پاکستان نے افغان جارحیت کا سخت جواب دیا اور آئندہ بھی ایسی کسی بھی کارروائی پر بھرپور ردعمل دیا جائے گا۔
وزیر دفاع نے مزید بتایا کہ چند ماہ قبل بھارت کو جنگ میں شکست سے دو چار کیا، جنگ میں بھارت کے 7 طیارے مار گرائے ، اس بات کا ذکر امریکی صدر بھی کئی بار کر چکے ہیں۔ امریکی صدر نے گزشتہ روز بھی ذکر کیا کہ پاک بھارت جنگ میں 7 طیارے گرائے گئے۔
یاد رہے اس سے قبل وزیردفاع نے طالبان کو خبردار کرتے ہوئے کہا تھا کہ اگر افغان سرزمین پاکستان کیخلاف استعمال کی گئی تو افغانستان کے اندر جا کر بھی جواب دیں گے۔