اوگاڈوگو (پاک ترک نیوز )مغربی افریقی ملک برکینا فاسو نے فرانس کے اثرورسوخ سے نکلنے اور روس کے ساتھ تعلقات بڑھانے کے بعد جرمنی کے ساتھ بھی تعاون کو فروغ دینے کا عندیہ دیا ہے۔
جرمنی کے اتحاد کی 36ویں سالگرہ کے موقع پر برکینا فاسو کے دارالحکومت اوگاڈوگو میں خصوصی تقریب منعقد ہوئی، جس میں دونوں ممالک کے درمیان دوطرفہ تعلقات مضبوط بنانے پر زور دیا گیا۔
جرمن سفیر ڈیٹرش بیکر نے اپنے خطاب میں کہا کہ قوموں کے درمیان پُرامن بقائے باہمی اور بین الاقوامی قوانین کا احترام ہی امن، ترقی اور آزادی کی ضمانت دے سکتا ہے۔ انہوں نے عالمی سرحدوں کے احترام اور جارحانہ جنگوں کی مخالفت پر بھی زور دیا۔
جرمن سفیر نے برکینا فاسو اور ساحل اتحاد (AES) کے دیگر رکن ممالک کی خودمختاری مضبوط بنانے کی کوششوں کو سراہا۔ انہوں نے مغربی افریقی ممالک کی تنظیم ایکواس (ECOWAS) اور ساحل اتحاد کے درمیان مذاکرات کی بحالی کا بھی خیرمقدم کیا۔
ان کا کہنا تھا کہ اختلافات کے مقابلے میں دونوں فریقوں کے درمیان مشترکہ مفادات کہیں زیادہ ہیں۔ انہوں نے برکینا فاسو کے صدر کیپٹن ابراہیم ٹراؤرے سے ہونے والی بات چیت کا حوالہ بھی دیا۔
جرمنی نے برکینا فاسو کے ساتھ تعاون جاری رکھنے کے عزم کا اظہار کرتے ہوئے RELANCE پروگرام کے تحت صاف پانی کی فراہمی، زرعی پیداوار کی مقامی سطح پر پروسیسنگ اور پائیدار صنعتی ترقی میں مدد دینے کی یقین دہانی کرائی۔
جرمن سفیر کے مطابق دونوں ممالک ثقافتی اور سائنسی شعبوں میں بھی تعلقات بڑھائیں گے۔ اس سلسلے میں برکینا فاسو کے نوجوانوں کے لیے جرمنی میں تعلیم اور تربیت کے مزید مواقع پیدا کرنے اور ملک میں گوئٹے انسٹی ٹیوٹ کی سرگرمیوں کو وسعت دینے کا منصوبہ ہے۔
تقریب میں برکینا فاسو کی نائب وزیر خارجہ اسٹیلا ایلڈین کابورے کابورے نے دونوں ممالک کے دیرینہ تعلقات کا ذکر کرتے ہوئے بتایا کہ جرمنی اور برکینا فاسو کے درمیان تعاون کا معاہدہ 1971 میں طے پایا تھا، جس کے بعد زراعت، توانائی، پانی، صفائی، سماجی تحفظ اور مالیاتی امور سمیت مختلف شعبوں میں تعاون بڑھا۔
انہوں نے کہا کہ دونوں ممالک کے درمیان شراکت داری اعتماد، باہمی احترام اور برکینا فاسو کی قومی ترجیحات کو مدنظر رکھتے ہوئے آگے بڑھنی چاہیے۔
انہوں نے فروری 2026 میں اوگاڈوگو میں ہونے والے دوطرفہ مذاکرات کا حوالہ بھی دیا، جن میں 2026 سے 2030 تک کے ترقیاتی منصوبے کے مطابق جرمنی کے تعاون کو مزید مؤثر بنانے پر تبادلہ خیال کیا گیا تھا۔
واضح رہے کہ ستمبر 2022 میں فوجی بغاوت کے بعد کیپٹن ابراہیم ٹراؤرے برکینا فاسو کے اقتدار میں آئے تو ملک کی خارجہ پالیسی میں بڑی تبدیلیاں دیکھنے میں آئیں۔
ان کی حکومت نے فرانس پر انحصار کم کرنے اور قومی خودمختاری مضبوط بنانے کا اعلان کیا۔ جنوری 2023 میں فرانسیسی فوجیوں کی برکینا فاسو میں موجودگی کا معاہدہ ختم کر دیا گیا، جس کے بعد فروری 2023 میں فرانسیسی فوج نے ملک سے انخلا مکمل کر لیا۔
