دبئی ( پاک ترک نیوز) آئی سی سی نے کرکٹ کے تینوں فارمیٹس کی نئی پلیئرز رینکنگ جاری کر دی ہے، ون ڈے بیٹرز میں بھارت کے شبمن گل کی پہلی پوزیشن برقرار ہے، جبکہ پاکستان کے بابر اعظم نویں نمبر پر موجود ہیں۔ون ڈے بیٹرز رینکنگ میں سری لنکا کے پون رتھنائیکے 20 درجے ترقی کے بعد 16ویں نمبر پر پہنچ گئے، پاکستان کے فخر زمان 9 درجے بہتری کے بعد 37ویں نمبر پر آگئے۔ انگلینڈ کے ٹام بینٹن 15 درجے ترقی کے بعد 47ویں اور سری لنکا کے کامیندو مینڈس 14 درجے بہتری کے بعد 60ویں نمبر پر پہنچ گئے۔
ون ڈے بولرز میں افغانستان کے راشد خان کی پہلی پوزیشن برقرار ہے۔ جنوبی افریقہ کے کیشو مہاراج ایک درجے ترقی کے بعد دوسرے نمبر پر آگئے، جبکہ پاکستان کے ابرار احمد ایک درجے تنزلی کے بعد تیسرے نمبر پر چلے گئے۔ شاہین شاہ آفریدی دو درجے بہتری کے بعد چھٹے اور حارث رؤف نو درجے تنزلی کے بعد 29ویں نمبر پر آگئے۔افغانستان کے عظمت اللہ عمرزئی 13 درجے ترقی کے بعد ساتویں، سری لنکا کے دنیتھ ویلالاگے آٹھ درجے بہتری کے بعد 19ویں اور انگلینڈ کے جیمی اوورٹن 28 درجے ترقی کے بعد 59ویں نمبر پر پہنچ گئے۔ پاکستان کے عرفات منہاس بھی 15 درجے بہتری کے بعد 68ویں پوزیشن پر آگئے۔ون ڈے آل راؤنڈرز میں افغانستان کے عظمت اللہ عمرزئی کی پہلی پوزیشن برقرار ہے، جبکہ محمد نبی پانچ درجے ترقی کے بعد تیسرے نمبر پر پہنچ گئے۔ٹیسٹ بیٹرز رینکنگ میں انگلینڈ کے ہیری بروک پہلے نمبر پر برقرار ہیں۔ جنوبی افریقہ کے ایڈن مارکرم ایک درجے ترقی کے بعد 11ویں اور ویان ملڈر سات درجے بہتری کے بعد 17ویں نمبر پر آگئے۔ آسٹریلیا کے کیمرون گرین اور ایلکس کیری بالترتیب 19ویں اور 20ویں نمبر پر پہنچ گئے، جبکہ جنوبی افریقہ کے ریان ریکلٹن 25 درجے ترقی کے بعد 23ویں اور ویسٹ انڈیز کے جسٹن گریوز 12 درجے بہتری کے بعد 39ویں نمبر پر آگئے۔
یہ بھی پڑھیں: امریکی وسط مدتی انتخابات،ٹرمپ کو دھچکا ،ڈیموکریٹس کی واضح فتح
ٹی ٹوئنٹی بیٹرز میں بھارت کے ابھیشک شرما کی پہلی پوزیشن برقرار ہے، پاکستان کے صاحبزادہ فرحان دوسرے اور بھارت کے ایشان کشن تیسرے نمبر پر موجود ہیں۔ بھارت کے شریاس ایئر دو درجے ترقی کے بعد ساتویں نمبر پر آگئے۔ٹی ٹوئنٹی بولرز میں افغانستان کے راشد خان پہلے اور پاکستان کے ابرار احمد چوتھے نمبر پر برقرار ہیں۔ نیوزی لینڈ کے مچل سینٹنر پانچویں اور پاکستان کے سلمان مرزا دو درجے ترقی کے بعد 13ویں نمبر پر آگئے۔ٹی ٹوئنٹی آل راؤنڈرز میں زمبابوے کے سکندر رضا کی پہلی پوزیشن برقرار ہے، پاکستان کے صائم ایوب دوسرے نمبر پر موجود ہیں، جبکہ افغانستان کے عظمت اللہ عمرزئی تین درجے ترقی کے بعد تیسرے نمبر پر آگئے۔
