کوئٹہ: بلوچستان کے مختلف علاقوں میں سکیورٹی فورسز کی کارروائیوں کے دوران مجموعی طور پر 19 دہشت گرد ہلاک کر دیے گئے، جبکہ بڑی مقدار میں اسلحہ اور دیگر جنگی سامان برآمد کیا گیا۔
کوئٹہ کے علاقے شعبان میں دہشت گردوں کی موجودگی کی اطلاع پر سیکیورٹی فورسز کا کلیئرنس آپریشن 21 ستمبر سے جاری ہے۔
سیکیورٹی فورسز کو خفیہ اداروں کی جانب سے شعبان میں بھارتی سرپرستی میں سرگرم فتنۃ الخوارج اور فتنۃ الہندوستان کے دہشت گردوں کی موجودگی کی اطلاع ملی تھی، جس کے بعد علاقے میں کارروائی شروع کی گئی۔
جاری کلیئرنس آپریشن کے دوران اب تک 13 دہشت گرد ہلاک کیے جا چکے ہیں، جبکہ دہشت گردوں کے ٹھکانوں سے بڑی مقدار میں ہتھیار اور دیگر اسلحہ بھی برآمد ہوا ہے۔
دوسری جانب 22 اور 23 ستمبر کو کیچ اور کوئٹہ ویسٹ میں بھی سیکیورٹی فورسز نے خفیہ اطلاعات پر کارروائیاں کیں۔ کارروائیوں کے دوران دہشت گردوں اور سیکیورٹی فورسز کے درمیان شدید فائرنگ کا تبادلہ ہوا، جس میں 6 دہشت گرد مارے گئے۔
کارروائیوں کے دوران دہشت گردوں کے ٹھکانوں سے بڑی مقدار میں اسلحہ برآمد کیا گیا۔
فائرنگ کے تبادلے میں 39 سالہ صوبیدار محمد جمیل بھی شہید ہوگئے۔ شہید صوبیدار محمد جمیل کا تعلق تونسہ شریف، ضلع ڈیرہ غازی خان سے تھا۔
سیکیورٹی فورسز کے مطابق صوبیدار محمد جمیل نے فرض کی ادائیگی کے دوران وطن کے دفاع کے لیے عظیم قربانی دی اور جام شہادت نوش کیا۔
سیکیورٹی فورسز کی جانب سے بلوچستان میں دہشت گردوں کے خلاف کارروائیاں جاری رکھنے اور علاقے میں امن و امان یقینی بنانے کے عزم کا اظہار کیا گیا ہے۔
