اسلام آباد (پاک ترک نیوز )پاکستان اور ملائیشیا کے درمیان دوطرفہ تعلقات، تجارت اور اقتصادی تعاون کے فروغ کے حوالے سے اہم پیش رفت سامنے آئی ہے۔ نائب وزیراعظم اور وزیر خارجہ اسحاق ڈار نے ملائیشیا کے وزیر خارجہ داتو سری محمد حسن سے ٹیلی فونک گفتگو کی، جس میں دونوں ممالک کے باہمی تعلقات اور مختلف شعبوں میں تعاون پر تفصیلی تبادلہ خیال کیا گیا۔
گفتگو کے دوران دونوں وزرائے خارجہ نے پاکستان اور ملائیشیا کے درمیان موجود دوستانہ تعلقات کو مزید مضبوط بنانے کے عزم کا اعادہ کیا۔ دونوں جانب سے اس بات پر اتفاق کیا گیا کہ دوطرفہ روابط کو مزید مستحکم بنانے کے لیے اعلیٰ سطحی رابطوں کا تسلسل ضروری ہے۔
اسحاق ڈار اور ملائیشین وزیر خارجہ کے درمیان گفتگو میں تجارت اور اقتصادی تعاون کے فروغ پر خصوصی توجہ دینے پر بھی اتفاق کیا گیا۔ دونوں ممالک کے درمیان معاشی روابط بڑھانے، تجارت کے حجم میں اضافے اور باہمی تعاون کے نئے مواقع تلاش کرنے کی اہمیت پر زور دیا گیا۔
دونوں وزرائے خارجہ نے اس بات پر بھی اتفاق کیا کہ پاکستان اور ملائیشیا کے درمیان دیرینہ دوستانہ تعلقات کو عملی تعاون کے مزید شعبوں تک وسعت دی جائے گی۔
ٹیلی فونک گفتگو کے دوران اسحاق ڈار اور داتو سری محمد حسن نے نیویارک میں ملاقات پر بھی اتفاق کیا۔ دونوں وزرائے خارجہ اقوام متحدہ کی جنرل اسمبلی کے 81ویں اجلاس کے موقع پر ملاقات کریں گے، جہاں پاک ملائیشیا دوطرفہ تعلقات سمیت باہمی دلچسپی کے دیگر امور پر مزید بات چیت متوقع ہے۔
