اسلام آباد ( پاک ترک نیوز) وزیراعظم کے مشیر رانا ثناء اللہ نے کہا ہے کہ ملک میں نئے صوبوں کے قیام کا فیصلہ پارلیمنٹ نے کرنا ہے، عوام چاہیں گے تو نئے صوبے بنیں گے، ورنہ نہیں۔لاہور میں میڈیا سے گفتگو کرتے ہوئے رانا ثناء اللہ نے کہا کہ اس وقت ملک میں نئے صوبوں کے قیام کی بحث جاری ہے، تاہم قومی اسمبلی اور کابینہ کے اجلاس میں نئے صوبوں کے معاملے پر کوئی بات نہیں ہوئی۔ آئندہ دنوں میں پارلیمنٹ میں اس معاملے پر بحث ہوسکتی ہے۔
انہوں نے کہا کہ پارلیمنٹ کے مشترکہ اجلاس سے نئے صوبوں کی منظوری ہوگی تو ہی ریفرنڈم کی طرف جایا جاسکے گا۔ نئے صوبوں پر بحث پارلیمنٹ میں ہونی چاہیے، جبکہ پارلیمنٹ جو فیصلہ کرے گی تمام سیاسی جماعتیں اسے قبول کریں گی۔پیپلز پارٹی کے ردعمل پر رانا ثناء اللہ نے کہا کہ پیپلز پارٹی نے صوبوں کے معاملے پر ضرورت سے زیادہ ردعمل دیا، تاہم پیپلز پارٹی اور مسلم لیگ ن کے درمیان تلخی میں کمی آئی ہے اور دونوں جماعتیں مل کر اپنے اختلافات حل کرلیں گی۔
یہ بھی پڑھیں: سونے اور چاندی کی قیمتوں میں معمولی اضافہ
جماعت اسلامی کے لانگ مارچ کے حوالے سے وزیراعظم کے مشیر نے کہا کہ پرامن سیاسی احتجاج سب کا حق ہے، تاہم جماعت اسلامی کو لانگ مارچ مؤخر کردینا چاہیے۔ جماعت اسلامی کے رہنماؤں سے کہا کہ وہ خواہ مخواہ اپنے آپ کو مشقت میں نہ ڈالیں۔مہنگائی کے حوالے سے رانا ثناء اللہ کا کہنا تھا کہ حکومت مہنگائی پر قابو پانے کے لیے اقدامات کررہی ہے۔
انہوں نے مزید کہا کہ پنجاب میں بلدیاتی انتخابات کرانے کا بھی ارادہ ہے۔
