کراچی ( پاک ترک نیوز) چیئرمین پاکستان پیپلز پارٹی بلاول بھٹو زرداری نے ووٹروں کے نام اپنے پیغام میں کہا کہ کشمیر کا فیصلہ کشمیری عوام خود کریں گے اور عوام حقِ حاکمیت کے لیے تیر کے انتخابی نشان پر مہر لگائیں۔
انہوں نے کہا کہ وہ کشمیری عوام کو پاکستانی شہریوں کی طرح حقوق دلوانا چاہتے ہیں اور پاکستان کے جن اداروں میں کشمیر کے پانی، بجلی اور بجٹ سے متعلق فیصلے ہوتے ہیں، وہاں کشمیر کی اپنی کرسی اور اپنی آواز ہونی چاہیے۔
آزاد جموں و کشمیر قانون ساز اسمبلی کے انتخابات کے دوسرے مرحلے میں کل مظفرآباد ڈویژن اور مہاجرین کی مجموعی طور پر 21 نشستوں پر پولنگ ہوگی، جس کے لیے تمام انتظامات مکمل کر لیے گئے ۔
یہ بھی پڑھیں: مسلم لیگ (ن) اور پیپلز پارٹی کے درمیان مذاکرات کا چوتھا دور آج متوقع
انتخابی شیڈول کے مطابق مظفرآباد ڈویژن کی 9 جبکہ مہاجرین کی 12 نشستوں پر ووٹنگ ہوگی۔ ضلع مظفرآباد کی 5، جہلم ویلی کی 2 اور نیلم کی 2 نشستوں پر پولنگ کا عمل جاری رہے گا۔
الیکشن حکام کے مطابق مظفرآباد ڈویژن میں 6 لاکھ 57 ہزار 710 رجسٹرڈ ووٹرز حقِ رائے دہی استعمال کریں گے، جبکہ مہاجرین جموں کی 6 نشستوں پر 4 لاکھ 5 ہزار 105 اور مہاجرین وادی کشمیر کی 6 نشستوں پر 33 ہزار 577 رجسٹرڈ ووٹرز اپنے ووٹ کا حق استعمال کریں گے۔
