اسلام آباد ( پاک ترک نیوز) وفاقی وزیر داخلہ محسن نقوی نے امریکا کے دورے کے دوران واشنگٹن میں بوئنگ کمپنی کے عالمی صدر برینڈن نیلسن سے ملاقات کی، جس میں پی آئی اے کے لیے 16 نئے طیاروں کی خریداری پر تفصیلی تبادلہ خیال کیا گیا۔ملاقات میں پی آئی اے کی نئی انتظامیہ کا وفد بھی شریک تھا۔
سرکاری حکام کے مطابق ملاقات میں پی آئی اے کے لیے 16 نئے طیاروں کے حصول کے منصوبے پر اہم پیش رفت ہوئی۔ دونوں فریقین نے مختلف طیاروں کے آپشنز، خریداری کے طریقہ کار اور بہترین تجارتی شرائط پر غور کیا۔ملاقات کے دوران اس بات پر اتفاق کیا گیا کہ معاہدے کو جلد از جلد حتمی شکل دینے کے لیے دونوں جانب سے رابطے جاری رکھے جائیں گے۔
یہ بھی پڑھیں: پی آئی اے ہولڈنگ کمپنی نے ملک و بیرونِ ملک 36 جائیدادیں اپنے پاس رکھ لیں
وزیر داخلہ محسن نقوی نے پی آئی اے کے لیے نئے طیاروں کی خریداری کے عمل کو تیز کرنے میں مکمل تعاون کی یقین دہانی پر بوئنگ کے صدر کا شکریہ ادا کیا۔ انہوں نے عالمی فضائی صنعت میں بوئنگ کے کردار کو سراہتے ہوئے طیارہ سازی کے شعبے میں کمپنی کی خدمات کی بھی تعریف کی۔
حکومت کے مطابق 16 نئے طیاروں کی خریداری پی آئی اے کے فلیٹ کی جدید کاری کی حکمت عملی کا اہم حصہ ہے، جس کا مقصد قومی ایئرلائن کی آپریشنل صلاحیت بڑھانا، پروازوں کے نیٹ ورک کو وسعت دینا اور مسافروں کو بہتر سہولیات فراہم کرنا ہے۔
پی آئی اے کے پاس اس وقت 30 طیارے موجود ہیں، جن میں سے 18 فعال ہیں، جبکہ 5 سے 6 طیارے مرمت اور دیکھ بھال کے مراحل سے گزر رہے ہیں۔
