اسلام آباد (پاک ترک نیوز )وزیراعظم نے منگی ڈیم پولیس اسٹیشن واقعے کے بعد پاک فوج، ایف سی اور بلوچستان پولیس کے "آپریشن شعبان” کی کامیابی پر سیکیورٹی فورسز کو زبردست خراجِ تحسین پیش کیا ہے اور سیکیورٹی فورسز کی جرات اور بہادری کی تعریف کی ہے۔
وزیراعظم شہبازشریف نے کہا فتنہ الخوارج کے خلاف گرینڈ آپریشن میں دہشت گردوں کو ہلاک کرنا فورسز کی اعلیٰ پیشہ ورانہ صلاحیتوں کا منہ بولتا ثبوت ہے،دشوار گزار پہاڑی علاقوں میں آپریشن فورسز کی حکمتِ عملی قابلِ ستائش ہے۔
وزیراعظم نے کہا خضدار میں پولیس اسٹیشن پر دہشت گردوں کا حملہ پسپا کرنے پر پاک فوج اور ایف سی کے دستوں کی کارروائی کو سراہتے ہیں،فتنہ الخوارج کے مکمل خاتمے تک سیکیورٹی فورسز اور قوم کے پختہ عزم میں کوئی کمی نہیں آئے گی، ملک سے دہشت گردی کی جڑ سے اکھاڑ پھینکیں گے۔
وزیر اعظم نے کہا بلوچستان کے امن و امان کو سبوتاژ کرنے کی ہر سازش ناکام بنا دی جائے گی؛ پوری قوم اپنی بہادر افواج اور پولیس کے شانہ بشانہ کھڑی ہے۔
