کیا آپ کا زیادہ تر وقت کرسی پر بیٹھ کر گزرتا ہے؟ دفتر میں کمپیوٹر کے سامنے، گاڑی چلاتے ہوئے یا گھر میں صوفے پر بیٹھے ہوئے؟ اگر جواب ہاں ہے تو یہ معلومات آپ کے لیے بے حد مفید ثابت ہو سکتی ہیں۔
ماہرین کا کہنا ہے کہ مسلسل بیٹھے رہنا جسم پر خاموش مگر گہرے اثرات مرتب کرتا ہے۔ وقت کے ساتھ کولہے سخت ہونے لگتے ہیں، کندھے آگے کی طرف جھک سکتے ہیں، کمر میں تناؤ پیدا ہو سکتا ہے اور پورا جسم ایک دباؤ والی کیفیت کا شکار ہو جاتا ہے۔
لیکن اچھی خبر یہ ہے کہ ان اثرات کو کم کرنے کے لیے ضروری نہیں کہ آپ گھنٹوں جم میں پسینہ بہائیں۔ ماہرین کے مطابق دن بھر میں صرف چند منٹ کی مختصر جسمانی سرگرمی بھی حیران کن فوائد دے سکتی ہے۔
یہ بھی پڑھیں: ہر وقت تھکن خطرناک بیماری کا اشارہ،کیا آپ کا جسم خاموشی سے ختم ہو رہا ہے ؟
حالیہ تحقیق کے مطابق ہر 30 منٹ بعد مختصر وقفہ لے کر ہلکی پھلکی حرکت کرنا جسم کو متحرک رکھنے، خون کی روانی بہتر بنانے اور ذہنی تازگی برقرار رکھنے میں مددگار ثابت ہو سکتا ہے۔ ماہرین اسے "ایکسرسائز اسنیکس” کا نام دیتے ہیں، یعنی دن بھر میں چھوٹے چھوٹے ایکٹیویٹی بریکس۔
اس مقصد کے لیے ماہرین نے ایک آسان "3 منٹ موبیلیٹی ری سیٹ” تجویز کیا ہے۔
پہلا مرحلہ سانس اور سکون کا ہے۔ سیدھے کھڑے ہو جائیں، ہاتھ پسلیوں کے نچلے حصے پر رکھیں اور گہری سانس لیں۔ 5 سیکنڈ میں سانس اندر کھینچیں، 7 سیکنڈ میں باہر نکالیں اور 3 سیکنڈ توقف کریں۔ اس عمل کو تین مرتبہ دہرائیں۔ اس سے جسم کو ریلیکس ہونے اور تناؤ کم کرنے میں مدد مل سکتی ہے۔
دوسرا مرحلہ جوڑوں کو حرکت دینا ہے۔ گردن کو آہستہ آہستہ دائیں اور بائیں گھمائیں، کندھوں کو پانچ بار آگے اور پانچ بار پیچھے گھمائیں۔ کمر، کولہوں اور ٹخنوں کو بھی ہلکی گردش دیں تاکہ جسم کی جکڑن کم ہو سکے۔
تیسرا مرحلہ پٹھوں کو دوبارہ فعال کرنا ہے۔ کرسی کے سامنے کھڑے ہو کر ہلکا سا بیٹھنے اور دوبارہ کھڑے ہونے کی مشق کریں۔ ہاتھوں کو کندھوں کی سطح تک لا کر پیچھے کی جانب کھینچیں یا دیوار کا سہارا لے کر پنجوں کے بل اوپر اٹھیں اور واپس نیچے آئیں۔
چوتھا اور آخری مرحلہ پورے جسم کو حرکت دینا ہے۔ ایک جگہ کھڑے ہو کر مارچ کریں یا چند منٹ کے لیے چہل قدمی شروع کر دیں۔ یہ سادہ سرگرمی جسم اور دماغ دونوں کے لیے فائدہ مند ثابت ہو سکتی ہے۔
ماہرین کا کہنا ہے کہ اگرچہ یہ 3 منٹ کی سرگرمی مکمل ورزش کا متبادل نہیں، لیکن مسلسل بیٹھنے کے منفی اثرات کم کرنے، جسم کو متحرک رکھنے اور دن بھر توانائی برقرار رکھنے میں اہم کردار ادا کر سکتی ہے۔
تو اگلی بار جب آپ خود کو طویل وقت سے کرسی پر بیٹھا پائیں، صرف 3 منٹ نکالیں اور اپنے جسم کو ایک نیا ری سیٹ دے دیں۔
