واشنگٹن (پاک ترک نیوز )امریکی اخبار کے مطابق ایران نے امریکا پر مفاہمتی یادداشت کی شرائط کی خلاف ورزی کا الزام لگاتے ہوئے آبنائے ہرمز کو دوبارہ بند کرنے کا اعلان کردیا، تاہم ایرانی وزارت خارجہ نے ان اطلاعات کی تردید کردی ہے۔
امریکی اخبار کے مطابق پاسداران انقلاب کی جانب سے سمندری ریڈیو چینلز پر جاری بیان میں کہا گیا ہے کہ اسرائیل کا لبنان سے انخلا، امریکی بحری ناکہ بندی کا مکمل خاتمہ اور خلیج فارس سے امریکی افواج کا انخلا امریکا ایران معاہدے کی بنیادی شرائط میں شامل ہے۔
اخبار کے مطابق پاسداران انقلاب کا کہنا ہے کہ امریکا کی جانب سے ان شرائط پر عملدرآمد تک آبنائے ہرمز بند رہے گی، تمام بحری جہاز آبنائے ہرمز کے قریب نہ جائیں، ہدایت کی خلاف ورزی پر بحری جہازوں کو نشانہ بنایا جائے گا۔
دوسری جانب ایرانی وزارت خارجہ کا کہنا ہے کہ آبنائے ہرمز کی بندش کی اطلاعات میں کوئی صداقت نہیں، حتمی معاہدے کے لیے مذاکرات کا اگلا دور شروع کرنے پر ثالثوں کے ذریعے مشاورت کا عمل جاری ہے۔
