واشنگٹن (پاک ترک نیوز )امریکی صدر ڈونلڈ ٹرمپ نے ایک بار پھر آبنائے ہرمز کو امریکی کنٹرول میں لینے کے عزائم کا اظہار کرتے ہوئے اس اہم آبی گزرگاہ کا نقشہ سوشل میڈیا پر شیئر کردیا۔
ٹرمپ نے اپنے سوشل میڈیا پلیٹ فارم ’ٹروتھ سوشل‘ پر آبنائے ہرمز کا نقشہ پوسٹ کیا، جس میں ایران اور عمان کے درمیان واقع اہم آبی گزرگاہ کے گرد دائرہ بنا کر اسے ’’نیا امریکی علاقہ‘‘ قرار دیا گیا تھا۔
امریکی صدر نے نقشے کے ساتھ کوئی کیپشن تحریر نہیں کیا، تاہم اس نقشے کو شیئر کرنے سے آبنائے ہرمز سے متعلق ان کے مؤقف کی ایک بار پھر نشاندہی ہوتی ہے۔
اس سے ایک روز قبل بھی ٹرمپ نے آبنائے ہرمز کو امریکی علاقہ قرار دینے کے منصوبے کی حمایت کرتے ہوئے اسے ’’ایک زبردست خیال‘‘ قرار دیا تھا۔
گزشتہ ہفتے صحافیوں کے سوال پر امریکی صدر نے واضح کیا تھا کہ آبنائے ہرمز کو امریکی علاقہ قرار دینے سے ان کی مراد اس آبی گزرگاہ کا کنٹرول حاصل کرنا ہے۔
ٹرمپ کا کہنا تھا کہ امریکا آبنائے ہرمز کو کنٹرول کرتا ہے اور ایران کی جانب سے اس آبی گزرگاہ کی بحری ناکہ بندی کے معاملے پر بھی امریکا کی نظر ہے۔
امریکی صدر نے جمعہ کو بھی کہا تھا کہ ایران کو شکست دینے کے بعد امریکا آبنائے ہرمز کو امریکی علاقہ قرار دینے کا ارادہ رکھتا ہے۔
