پیرس ( پاک ترک نیوز) فرانس کے دارالحکومت پیرس میں عالمی دفاعی و سیکیورٹی نمائش "یوروسیٹری 2026” میں سعودی عرب کے پویلین کا باضابطہ افتتاح کر دیا گیا۔ نمائش 15 سے 19 جون تک جاری رہے گی جس میں سعودی عرب کے سرکاری اور نجی شعبے کے 10 ادارے شریک ہیں۔
سعودی جنرل اتھارٹی برائے ملٹری انڈسٹریز کے بیان کے مطابق نمائش دنیا بھر کی دفاعی اور سکیورٹی صنعتوں کے رہنماؤں کو ایک پلیٹ فارم فراہم کر رہی ہے، جہاں شراکت داریوں کو فروغ دینے، مہارتوں کے تبادلے اور سعودی عرب کی دفاعی صنعتی صلاحیتوں کو اجاگر کرنے کا موقع میسر آئے گا۔
سعودی پویلین کا افتتاح گامی کے گورنر انجینئر احمد العوہلی نے کیا۔ اس موقع پر جنرل اتھارٹی فار ڈیفنس ڈویلپمنٹ کے گورنر ڈاکٹر فالح السلیمان، معاون وزیر دفاع برائے انتظامی امور ڈاکٹر خالد البیاری، فرانس میں سعودی سفیر فہد الرویلی، سعودی کمپنیوں کے سربراہان، فوجی حکام اور عالمی دفاعی ماہرین بھی موجود تھے۔
پویلین میں سعودی عرب کی دفاعی صنعت میں ہونے والی نمایاں پیش رفت، جدید دفاعی نظام، نئی ٹیکنالوجیز اور عسکری شعبے میں صنعتی و خدماتی صلاحیتوں کو پیش کیا جا رہا ہے۔ اس کے ساتھ عالمی دفاعی کمپنیوں کے ساتھ تعاون اور سرمایہ کاری کے نئے مواقع بھی تلاش کیے جا رہے ہیں۔
نمائش میں گامی کے علاوہ وزارت صنعت و معدنی وسائل، جنرل اتھارٹی فار ڈیفنس ڈویلپمنٹ، سعودی عربین ملٹری انڈسٹریز،ایمان انڈسٹریل کمپنی، سعودی کیمیکل کمپنی لمیٹڈ، جی ڈی سی مڈل ایسٹ، لائف شیلڈ، ورلڈ ڈیفنس شو، ٹی اے ایم ایرو اسپیس اینڈ ڈیفنس اور میدانہ کمپنی سمیت دیگر ادارے شریک ہیں۔
گامی کے گورنر انجینئر احمد العوہلی نے کہا کہ یوروسیٹری 2026 میں سعودی عرب کی شرکت مملکت کے دفاعی شعبے میں قائدانہ کردار کو مزید مضبوط بنائے گی اور عالمی دفاعی کمپنیوں کے ساتھ شراکت داریوں کو فروغ دے گی۔ انہوں نے کہا کہ یہ اقدام سعودی وژن 2030 کے اہداف کے حصول میں بھی معاون ثابت ہوگا، جن میں 2030 تک فوجی اخراجات کا 50 فیصد سے زائد مقامی سطح پر لانے کا ہدف شامل ہے۔
نمائش کے دوران سعودی پویلین میں دوطرفہ ملاقاتوں، ٹیکنالوجی کی منتقلی، مہارتوں کے تبادلے اور سرمایہ کاری کے مواقع پر بھی تبادلہ خیال کیا جائے گا۔ حکام کے مطابق اس سے قومی کمپنیوں کی عالمی مسابقت میں اضافہ، قومی سلامتی کے اہداف کے حصول اور پائیدار اقتصادی ترقی کو فروغ ملے گا۔
