اسلام آباد ( پاک ترک نیوز) پاکستان نے سعودی عرب پر حوثیوں کے حملوں کی مذمت کرتے ہوئے سعودی عرب کی خودمختاری اور علاقائی سالمیت کے تحفظ کے عزم کا اعادہ کیا ہے۔ترجمان دفتر خارجہ کے مطابق پاکستان سعودی عرب کے ساتھ مکمل یکجہتی کا اظہار کرتا ہے اور سعودی عرب پر ہونے والے حملوں پر بدستور تشویش رکھتا ہے۔ پاکستان نے حملوں میں جاں بحق افراد کے لواحقین سے تعزیت کا اظہار کرتے ہوئے کہا ہے کہ شہریوں اور بنیادی ڈھانچے کو نشانہ بنانا ناقابل قبول ہے۔ترجمان دفتر خارجہ کا کہنا ہے کہ ایسے حملے علاقائی سلامتی کے لیے خطرہ ہیں۔ پاکستان معاہدہ مکہ کے تحت سعودی عرب کے ساتھ کھڑا ہے اور اس کی خودمختاری اور علاقائی سالمیت کے تحفظ کے لیے پرعزم ہے۔
یہ بھی پڑھیں: انڈونیشیا کا دھوئیں سے نمٹنے کے لیے انوکھا تجربہ، آسمان سے خشک برف برسائی جائے گی
ترجمان دفتر خارجہ نے بتایا کہ عمان کے وزیر خارجہ نے پاکستان کا دورہ کیا، جس کے دوران دونوں ممالک نے مختلف اہم شعبوں میں تعاون بڑھانے پر اتفاق کیا۔ اس موقع پر پاکستان اور عمان کے درمیان پانچ معاہدوں اور مفاہمتی یادداشتوں پر دستخط کیے گئے۔ ترجمان کے مطابق ان معاہدوں سے دونوں ممالک کے دیرینہ تعلقات مزید مضبوط ہوں گے۔ترجمان دفتر خارجہ نے مزید بتایا کہ نائب وزیراعظم اور وزیر خارجہ اسحاق ڈار کی روسی وزیر داخلہ سے ملاقات بھی ہوئی، جس میں پاکستان اور روس کے تعلقات میں ہونے والی مثبت پیش رفت کا جائزہ لیا گیا۔ملاقات میں دونوں ممالک نے کثیرالجہتی فورمز پر مسلسل تعاون کی اہمیت پر اتفاق کیا۔
