کیلیفورنیا ( پاک ترک نیوز) ایلون مسک دنیا کے پہلے کھرب پتی بن گئے ،اسپیس ایکس کے حصص اسٹاک مارکیٹ میں تیزی سے اوپر چلے گئے۔
اسپیس ایکس نے اسٹاک مارکیٹ میں شاندار آغاز کیا، جہاں کمپنی کے شیئرز اپنی ابتدائی قیمت سے نمایاں اضافے کے ساتھ ٹریڈ ہوئے اور کچھ وقت کے لیے کمپنی کی مجموعی مالیت 2 کھرب (2 ٹریلین) ڈالر سے بھی تجاوز کر گئی۔
اس تاریخی لسٹنگ کے بعد اسپیس ایکس دنیا کی سب سے قیمتی کمپنیوں کی صف میں شامل ہو گئی، جبکہ مصنوعی ذہانت اور خلائی ٹیکنالوجی کے شعبوں میں سرمایہ کاروں کی دلچسپی مزید بڑھ گئی ہے۔
اسپیس ایکس کے شیئرز 135 ڈالر کی ابتدائی قیمت کے مقابلے میں 150 ڈالر پر کھلے،بعد ازاں ٹریڈنگ کے دوران 164 ڈالر تک پہنچ گئے۔ اس زبردست اضافے کے بعد کمپنی مارکیٹ ویلیو کے لحاظ سے امریکا کی چھٹی بڑی پبلک کمپنی بن گئی۔
کمپنی نے تقریباً 55 کروڑ 60 لاکھ شیئرز فروخت کرکے 75 ارب ڈالر حاصل کیے، جس کے نتیجے میں لسٹنگ کے وقت اس کی مالیت 1.77 ٹریلین ڈالر رہی۔ بعد ازاں شیئرز کی قیمت میں مزید اضافے سے کمپنی کی مالیت 2 ٹریلین ڈالر کی حد عبور کر گئی۔ اسپیس ایکس امریکا کی پہلی کمپنی بن گئی جس نے ایک ٹریلین ڈالر سے زائد مالیت کے ساتھ اسٹاک مارکیٹ میں قدم رکھا۔
