اسلام آباد ( پاک ترک نیوز) وفاقی بجٹ آج پیش کیا جائے گا، وزیر خزانہ محمد اورنگزیب قومی اسمبلی میں بجٹ پیش کریں گے ،وفاقی بجٹ کا مجموعی حجم ساڑھے 17 ہزار ارب روپے ہونے کا امکان ہے۔
بجٹ میں ٹیکس ریونیو کا ہدف 15 ہزار 267 ارب روپے ہوگا، قرضوں پر سود ادا کرنے کے لیے 7 ہزار 824 ارب روپے کی بھاری رقم مختص کی جائے گی۔ دفاعی بجٹ کے لیے 3 ہزار ارب روپے رکھے جائیں گے۔
وفاقی بجٹ میں سرکاری ملازمین کی تنخواہوں اور پینشن میں اضافہ متوقع ہے ، پیٹرولیم لیوی کی مد میں ایک ہزار 727 ارب روپے وصول کرنے کا پلان ہے۔
بجٹ میں برآمدات کا ہدف 328 ارب ڈالر اور درآمدات کا ہدف 70 ارب ڈالر مقرر کیا جائے گا، کوئی نیا ترقیاتی منصوبہ شروع نہیں کیا جائے گا، پہلے سے جاری ترقیاتی منصوبوں پر کام ہو گا۔
وزیراعظم شہبازشریف کی زیر صدارت وفاقی کابینہ کا اجلاس بھی آج ہو گا جس میں نئے وفاقی بجٹ کی منظوری دی جائے گی ، وفاقی وزیرخزانہ محمد اورنگزیب کابینہ کو بجٹ پر بریفنگ دیں گے۔
