لاہور(پاک ترک نیوز)وفاقی وزیر خزانہ محمد اورنگزیب نے کہا ہے کہ عالمی معیشت اس وقت بے یقینی کی صورتحال سے دوچار ہے اور عالمی تنازعات کے اثرات اشیائے ضروریہ کی قیمتوں پر بھی مرتب ہو سکتے ہیں، تاہم ان چیلنجز کے باوجود پاکستان میں معاشی بحالی کا سفر جاری ہے۔لاہور میں ایک تقریب سے خطاب کرتے ہوئے وزیر خزانہ محمد اورنگزیب نے کہا کہ معاشی ترقی کے عمل کو آگے بڑھانے کے لیے نجی شعبے کی حوصلہ افزائی کی جا رہی ہے اور سرمایہ کاروں کو ہر ممکن سہولیات فراہم کی جا رہی ہیں۔
یہ بھی پڑھیں: چین کی سپر پاور بننے کیلئے بڑی عسکری چال
انہوں نے کہا کہ عالمی سرمایہ کار پاکستان کے ساتھ دیگر منڈیوں پر بھی نظر رکھے ہوئے ہیں، جبکہ پاکستان کے بانڈز میں یورپ اور امریکا کے سرمایہ کار بھی دلچسپی لے رہے ہیں۔وفاقی وزیر خزانہ کا کہنا تھا کہ ملک میں ٹیکس نظام کو بہتر بنانے کے لیے اصلاحات کی ضرورت ہے۔ اس مقصد کے لیے ٹیکس نظام میں بہتری اور ٹیکس نیٹ کو وسعت دینے کے اقدامات کیے جا رہے ہیں۔محمد اورنگزیب نے کہا کہ معاشی ترقی کے تسلسل کے لیے سرمایہ کاری کا فروغ، نجی شعبے کی مؤثر شمولیت اور ٹیکس نظام میں اصلاحات اہمیت رکھتی ہیں۔
