اسلام آباد ( پاک ترک نیوز) وفاقی وزیر خزانہ محمد اورنگزیب اور عالمی مالیاتی فنڈ کی منیجنگ ڈائریکٹر کرسٹالینا جارجیوا کے درمیان اہم ملاقات ہوئی، جس میں پاکستان کی معاشی صورتحال، اصلاحاتی اقدامات اور اقتصادی اہداف پر عمل درآمد سے متعلق امور پر تبادلہ خیال کیا گیا۔ذرائع کے مطابق وزیر خزانہ محمد اورنگزیب نے آئی ایم ایف حکام کو ملکی معیشت کی تازہ صورتحال اور مقررہ اقتصادی اہداف کے حصول کے لیے کیے جانے والے اقدامات پر بریفنگ دی۔
ملاقات کے دوران آئی ایم ایف کی سربراہ نے پاکستان پر زور دیا کہ قرض پروگرام کی شرائط پر مؤثر عمل درآمد یقینی بنایا جائے اور معاشی اصلاحات کا تسلسل برقرار رکھا جائے۔ذرائع کے مطابق آئی ایم ایف کی جانب سے اس بات پر بھی زور دیا گیا کہ رواں مالی سال کے دوران وفاقی بورڈ آف ریونیو کو 15 ہزار 264 ارب روپے کے محصولات کا ہدف حاصل کرنا ہوگا اور اس ضمن میں محصولات کی وصولی میں کمی کی کوئی گنجائش نہیں ہوگی۔
یہ بھی پڑھیں: کینیڈا کا 2026 سے 2028 تک 11 لاکھ 40 ہزار تارکین وطن کو مستقل رہائش دینے کا منصوبہ
ملاقات میں پاکستان کے اقتصادی اہداف کے حصول، مالیاتی نظم و ضبط اور محصولات بڑھانے کے اقدامات کی اہمیت پر بھی تبادلہ خیال کیا گیا۔
