ماڈل ایگریکلچر مالز میں کاشتکاروں کو زرعی ماہرین سے مشاورت، معیاری زرعی اشیاء اور دیگر ضروری سہولیات ایک ہی مقام پر دستیاب ہیں
لاہور( پاک ترک نیوز) وزیراعلیٰ پنجاب مریم نواز شریف کے کسان دوست ویژن کے تحت صوبے میں پہلی مرتبہ کاشتکاروں کو گاؤں کے قریب ایک ہی چھت تلے جدید زرعی سہولیات فراہم کی جا رہی ہیں۔ اس سلسلے میں پنجاب کے چار اضلاع ملتان، بہاولپور، ساہیوال اور سرگودھا میں ماڈل ایگریکلچر مالز فعال کر دیے گئے ۔
تفصیلات کے مطابق وزیراعلیٰ پنجاب مریم نواز کا کسان دوست ویژن،4اضلاع میں ماڈل ایگریکلچر مال فنکشنل فعال کردیئے گئے۔
ماڈل ایگریکلچر مالز میں کاشتکاروں کو زرعی ماہرین سے مشاورت، معیاری زرعی اشیاء اور دیگر ضروری سہولیات ایک ہی مقام پر دستیاب ہیں۔ اس کے علاوہ جدید ترین زرعی مشینری اور آلات بھی رینٹ پر حاصل کیے جا سکیں گے، جس سے کسانوں کی پیداواری لاگت میں کمی اور زرعی پیداوار میں اضافہ متوقع ہے۔
حکومت پنجاب نے فیصل آباد، جھنگ، اوکاڑہ اور خانیوال میں بھی نئے ماڈل ایگریکلچر مالز کے قیام کا فیصلہ کیا ہے، جبکہ راجن پور، وہاڑی، رحیم یار خان، اٹک اور میانوالی میں بھی یہ منصوبہ مرحلہ وار مکمل کیا جائے گا۔
وزیراعلیٰ پنجاب مریم نواز شریف کا کہنا ہے پنجاب کے کاشتکاروں کی سہولت اور خوشحالی کے لیے ہر ممکن اقدام کیا جا رہا ہے۔ کسانوں کی تقدیر بدل چکی ہے اور ان کے اچھے دن آ چکے ہیں۔
وزیراعلیٰ نے اعلان کیا کہ پنجاب کے تمام اضلاع میں مرحلہ وار ماڈل ایگریکلچر مالز قائم کیے جائیں گے تاکہ ہر کسان جدید زرعی سہولیات سے مستفید ہو سکے۔
وزیراعلیٰ نے کہا حکومت پنجاب زرعی شعبے کی ترقی، کسانوں کی معاونت اور جدید ٹیکنالوجی کے فروغ کے لیے عملی اقدامات جاری رکھے گی، جس سے نہ صرف زرعی پیداوار میں اضافہ ہوگا بلکہ دیہی معیشت بھی مزید مضبوط ہوگی۔
