لاہور( پاک ترک نیوز) وزیراعلیٰ پنجاب مریم نواز شریف چین کے چار روزہ سرکاری دورے پر روانہ ہوگئیں۔ چین کے قونصل جنرل سن یان بھی وزیراعلیٰ پنجاب کو چین روانگی پر الوداع کہنے کے لیے ایئرپورٹ پر موجود تھے۔مریم نواز شریف چین کے شہر ارومچی پہنچیں گی، جہاں بین الاقوامی ہوائی اڈے پر چین کے اعلیٰ حکام ان کا استقبال کریں گے۔وزیراعلیٰ پنجاب اپنے دورے کے دوران شِن جِیانگ اسٹیٹ گیسٹ ہاؤس کے کانفرنس سینٹر کُنلُن ہال میں اپنی سرکاری مصروفیات کا آغاز کریں گی۔
دورے کے دوران شِن جِیانگ کے پارٹی سیکریٹری چِن شیاوجیانگ کی سربراہی میں اعلیٰ سطح کا وفد وزیراعلیٰ مریم نواز شریف سے ملاقات کرے گا۔وزیراعلیٰ پنجاب کی ڈپٹی پارٹی سیکریٹری شِن جِیانگ اویغور خودمختار علاقائی کمیٹی ہی ژونگ یو سے بھی ملاقات ہوگی، جس میں باہمی دلچسپی کے امور اور تعاون کے مختلف پہلوؤں پر گفتگو کی جائے گی۔
یہ بیھ پڑھیں: اسحاق ڈار کا ترک وزیر خارجہ خاقان فیدان سے ٹیلیفونک رابطہ
مریم نواز شریف شِن جِیانگ پروڈکشن اینڈ کنسٹرکشن کور (XPCC) کے وفد سے بھی اہم ملاقات کریں گی۔دورے کے دوران وزیراعلیٰ پنجاب اور پاکستانی وفد کے اعزاز میں ڈپٹی پارٹی سیکریٹری شِن جِیانگ اویغور خودمختار علاقائی کمیٹی، پارٹی سیکریٹری اور پولیٹیکل کمشنر ہی ژونگ یو کی جانب سے عشائیہ بھی دیا جائے گا۔وزیراعلیٰ پنجاب مریم نواز شریف چین کے سرکاری مہمان کی حیثیت سے شِن جِیانگ اسٹیٹ گیسٹ ہاؤس میں قیام کریں گی۔
