لاہور( پاک ترک نیوز) وزیراعلیٰ پنجاب مریم نواز شریف سے اوکاڑہ کے ارکان صوبائی اسمبلی نے ملاقات کی، جس میں صوبے کی سیاسی صورتحال، ترقیاتی منصوبوں اور حلقوں کو درپیش عوامی مسائل پر تفصیلی تبادلہ خیال کیا گیا۔
ملاقات کرنے والوں میں صوبائی وزیر عاشق حسین شاہ، جاوید علاؤالدین ساجد، چوہدری افتخار حسین چھچھڑ، نور الامین وٹو، علی عباس، میاں یاور زمان، میاں محمد منیر اور غلام رضا شامل تھے۔
ارکان صوبائی اسمبلی نے اپنے حلقوں میں درپیش عوامی مسائل سے وزیراعلیٰ کو آگاہ کیا، جس پر مریم نواز شریف نے مسائل کے حل کی بھرپور یقین دہانی کرائی۔
ارکان اسمبلی نے 41 اضلاع اور دو تحصیلوں میں مربوط سیف سٹی نیٹ ورک قائم کرنے پر وزیراعلیٰ مریم نواز کو خراج تحسین پیش کیا۔
انہوں نے اوکاڑہ جی ٹی روڈ سے بائی پاس سڑک کی تعمیر و بحالی اور شہریوں کے لیے الیکٹروبس سروس کے آغاز پر بھی وزیراعلیٰ کا شکریہ ادا کیا۔
ارکان اسمبلی کے مطابق اوکاڑہ میں الیکٹروبسیں جنرل بس اسٹینڈ سے اختر آباد، کرمانوالہ، اڈہ کسان اور اوکاڑہ یونیورسٹی تک چل رہی ہیں، جبکہ طلبہ، خواتین اور بزرگوں کے لیے مفت سفر کی سہولت قابلِ تحسین ہے۔ارکان اسمبلی نے کہا کہ سیف سٹی منصوبے اور پولیس کی مؤثر کارروائیوں کے باعث پنجاب میں جرائم کی شرح بتدریج کم ہورہی ہے۔ وزیراعلیٰ مریم نواز کی قیادت میں پنجاب بہتر سے بہترین کی جانب بڑھ رہا ہے۔ان کا کہنا تھا کہ الیکٹروبس، اپنی چھت اپنا گھر اور کسان کارڈ جیسے منصوبے عوام میں مقبول ہورہے ہیں۔اس موقع پر وزیراعلیٰ مریم نواز شریف نے ارکان اسمبلی کو عوام سے بھرپور رابطے رکھنے کی ہدایت کی۔مریم نواز شریف نے کہا کہ پنجاب میں عوامی منصوبوں کی تکمیل کے لیے کم وقت میں زیادہ سے زیادہ کام کرنا چاہتے ہیں۔
وزیراعلیٰ نے کہا کہ پہلی بار صوبے کے تمام شہروں اور دیہات کو ستھرا پنجاب کے ذریعے یکساں طور پر صاف کیا جارہا ہے۔مریم نواز کا کہنا تھا کہ پنجاب کے عوام کے معیار زندگی میں بہتری کی خبریں سن کر انہیں دلی سکون ملتا ہے۔
