لاہور( پاک ترک نیوز) وزیراعلیٰ پنجاب مریم نواز شریف نے ستھرا پنجاب پروگرام کے ورکرز کو ہر ماہ 5 تاریخ سے پہلے تنخواہوں کی ادائیگی یقینی بنانے کا حکم دے دیا۔
وزیراعلیٰ کی ہدایت پر ستھرا پنجاب کی 151 میں سے 149 کمپنیوں کے ورکرز کو ادائیگی مکمل کردی گئی ہے، جبکہ روجھان اور چوبارہ میں ورکرز کو بروقت ادائیگی نہ کرنے والی متعلقہ کمپنیوں کے خلاف فوری قانونی کارروائی کی ہدایت کی گئی ہے۔مریم نواز شریف نے واضح کیا کہ ستھرا پنجاب ورکرز کو بروقت تنخواہ نہ دینے والوں کے خلاف سخت اور فوری قانونی کارروائی کی جائے گی۔ انہوں نے کہا کہ صفائی آپریشن میں کرپشن، غفلت یا گھپلے کو کسی صورت برداشت نہیں کیا جائے گا۔
وزیراعلیٰ نے کمرشل اور رہائشی علاقوں میں مسلسل صفائی برقرار رکھنے والے شہریوں کی حوصلہ افزائی کے لیے انوائرمنٹ فرینڈلی سٹیزن سٹیکر دینے کا اعلان بھی کیا۔ صفائی برقرار رکھنے والے شہریوں کو وزیراعلیٰ کی جانب سے گفٹ یا سرٹیفکیٹ بھی دیا جائے گا۔مریم نواز نے ایم ڈی واسا کو روزانہ کم از کم دو گھنٹے فیلڈ میں رہنے اور ٹی ایم اوز و ایف ایم اوز کو روزانہ کم از کم پانچ یونین کونسلز کا دورہ کرکے صفائی کی صورتحال کا جائزہ لینے کی ہدایت کی۔انہوں نے ہر ڈویژنل ہیڈکوارٹر میں ستھرا پنجاب اینٹی لٹرنگ سکواڈ فعال کرنے کا حکم دیا۔ ای بائیکس پر سوار سکواڈز سڑکوں، گلی محلوں اور بازاروں میں صفائی اور کچرے کی صورتحال کی نگرانی کریں گے۔
وزیراعلیٰ نے ستھرا پنجاب ورکرز کے لیے مری کی طرز پر گاربیج بیگ ساتھ رکھنا لازمی قرار دینے کی ہدایت بھی کی۔مریم نواز شریف نے شہروں اور دیہات میں عملے اور ورکرز کی غیر حاضری کی رپورٹس کا سخت نوٹس لیتے ہوئے صفائی میں کوتاہی برتنے والے افسران پر برہمی کا اظہار کیا۔ انہوں نے گلی محلوں اور سڑکوں کے اطراف خالی پلاٹس کی صفائی، ویسٹ انکلیوژرز کی باقاعدگی سے صفائی اور ٹوٹی دیواروں و دروازوں کی مرمت یقینی بنانے کی ہدایت کی۔
وزیراعلیٰ نے مکینیکل سویپرز کی بروقت مرمت اور ان کی کارکردگی کا روزانہ جائزہ لینے کا حکم بھی دیا، جبکہ نکاسی آب میں بہتری کے لیے ڈی سلٹنگ کا عمل جاری رکھنے کی ہدایت کی۔مریم نواز نے ستھرا پنجاب سے متعلق عوامی شکایات فوری حل کرنے اور پروگرام کے ایم ڈی، ایف ایم اوز اور ٹی ایم اوز کے کارکردگی کے اشاریے (KPIs) مقرر کرنے کی ہدایت کی۔وزیراعلیٰ نے واضح کیا کہ ستھرا پنجاب میں ناقص کارکردگی دکھانے والے ایم ڈی کو تین سال تک پوسٹنگ نہیں ملے گی، جبکہ وہ خود بھی ہر شہر میں ستھرا پنجاب کمپنی کی کارکردگی کی نگرانی کریں گی۔
یہ بھی پڑھیں: نواز شریف کو لاہور کی خوبصورتی اور ترقیاتی منصوبوں پر اہم بریفنگ
مریم نواز شریف نے کہا کہ "ستھرا پنجاب عوام کی سہولت، صفائی اور سوشل سروس کا قابلِ قدر پروگرام ہے۔” انہوں نے کہا کہ صفائی آپریشن میں ہر روز بہتری آنی چاہیے اور دفاتر میں بیٹھ کر تنخواہیں لینے والے افراد کو کام کرنا ہوگا۔وزیراعلیٰ نے مزید کہا کہ مرکزی سڑکوں پر گندگی سے بھرے ویسٹ انکلیوژرز افسوسناک ہیں، ایسے معاملات میں غفلت اور کرپشن برداشت نہیں کی جائے گی اور ذمہ داروں کے خلاف سخت ترین کارروائی ہوگی۔
