لاہور( پاک ترک نیوز) سوئٹزر لینڈ نے دنیا کی سب سے طاقتور زیرِ زمین بیٹری نصب کرنے کے لیے دو فٹبال میدانوں کے برابر بڑا گڑھا کھود ڈالا۔ یہ بیٹری چند ملی سیکنڈز میں 1.2 گیگا واٹ بجلی خارج کرنے، 2.1 گیگا واٹ آور توانائی ذخیرہ کرنے کی صلاحیت رکھتی ہے، جبکہ اس منصوبے کی لاگت تقریباً 5 ارب سوئس فرانک تک بتائی جارہی ہے۔
سوئٹزرلینڈ کے زیرِ زمین اس منصوبے کا مقصد یورپ کے بجلی کے نظام کو مستحکم بنانا ہے۔ یہ دیوہیکل انرجی اسٹوریج سسٹم ملی سیکنڈز میں ردعمل دینے، ریڈوکس فلو ٹیکنالوجی استعمال کرنے اور ایک نیوکلیئر پاور پلانٹ کے برابر صلاحیت رکھنے کے باعث غیر معمولی اہمیت اختیار کرگیا ۔
بیٹری کی بجلی پیدا کرنے کی صلاحیت 1.2 گیگا واٹ اور ذخیرہ کرنے کی گنجائش 2.1 گیگا واٹ آور سے زائد ہوگی۔
بیٹری کے علاوہ اس منصوبے میں مستقبل کا لافن برگ ٹیکنالوجی سینٹر بھی شامل ہے، جو 20 ہزار مربع میٹر پر مشتمل ایک جدید کمپلیکس ہوگا۔ یہاں توانائی ذخیرہ کرنے کے نظام، مصنوعی ذہانت پر مبنی ڈیٹا سینٹر، کارپوریٹ دفاتر اور جدید لیبارٹریاں قائم کی جائیں گی۔ اس مقام کو یورپ کے برقی نظام کے لیے انتہائی اسٹریٹجک قرار دیا جارہا ہے۔
یہ تنصیب ملی سیکنڈز میں بجلی جذب کرنے یا واپس گرڈ میں شامل کرنے کی صلاحیت رکھے گی، جو شمسی اور ہوائی توانائی جیسے قابلِ تجدید ذرائع پر بڑھتے ہوئے انحصار کے باعث پیدا ہونے والے اتار چڑھاؤ کو کم کرنے میں اہم کردار ادا کرے گی۔
دنیا کی سب سے طاقتور بیٹری نصب کرنے کیلئے 2فٹبال میدانوں کے برابر گڑھا کھود دیا گیا
