واشنگٹن ( پاک ترک نیوز) امریکی نیوکلیئر ٹیکنالوجی کمپنی ڈیپلویبل انرجی نے اپنی کمپیکٹ یونٹی نیوکلیئر بیٹری کو ابتدائی تجربات سے مکمل طاقت پر آپریشن کی جانب منتقل کردیا ہے۔ کمپنی کی جانب سے یہ جدید نیوکلیئر ری ایکٹر آئیڈاہو نیشنل لیبارٹری میں مکمل طاقت پر آزمایا جائے گا، جبکہ بعد ازاں اسے سمندری ماحول میں بھی ٹیسٹ کیا جائے گا۔
کمپنی کے مطابق یونٹی نیوکلیئر بیٹری پہلے ہی آئیڈاہو نیشنل لیبارٹری میں صرف 155 دن میں کریٹیکلٹی حاصل کرچکی ہے۔ یہ مرحلہ ری ایکٹر کے نیوکلیئر ردعمل کے مستقل طور پر شروع ہونے کی نشاندہی کرتا ہے۔اب مکمل طاقت کے تجربات کے دوران ری ایکٹر کے کنٹرول سسٹم، حفاظتی نظام، کارکردگی اور آپریشنل طریقہ کار کو جانچا جائے گا۔ حاصل ہونے والے ڈیٹا کو مستقبل میں امریکی نیوکلیئر ریگولیٹری کمیشن سے لائسنس کے حصول میں بھی استعمال کیا جائے گا۔
منصوبے کے دوسرے مرحلے میں ڈیپلویبل انرجی، ہارن بیک آف شور کے تعاون سے یونٹی نیوکلیئر بیٹری کو سمندری ماحول میں آزمانے کا ارادہ رکھتی ہے۔اس تجربے کے دوران یہ دیکھا جائے گا کہ کمپیکٹ نیوکلیئر پاور سسٹم سمندری اور آف شور آپریشنز میں کس طرح کام کرتا ہے۔ اس میں محدود جگہ، وزن، رسد، ماحولیاتی حالات اور دیگر نظاموں کے ساتھ انضمام جیسے عوامل کا جائزہ لیا جائے گا۔
کمپنی کے مطابق صرف بجلی کی پیداوار ہی نہیں بلکہ نیوکلیئر پاور سسٹم کو ایک جگہ سے دوسری جگہ منتقل کرنے، آف شور تنصیب، انضمام اور آپریشن کے پورے عمل کو بھی جانچا جائے گا۔ہارن بیک آف شور کے چیئرمین ٹوڈ ایم ہارن بیک کا کہنا ہے کہ سمندری نیوکلیئر آپریشنز میں یہ تجربہ بجلی پیدا کرنے کے ساتھ ساتھ اس ٹیکنالوجی کی عملی تنصیب اور استعمال کے طریقہ کار کو سمجھنے میں مدد دے گا۔
ڈیپلویبل انرجی کے مطابق مستقبل میں اس قسم کے مائیکرو ری ایکٹرز ان علاقوں میں استعمال کیے جاسکتے ہیں جہاں روایتی بجلی کا بنیادی ڈھانچہ قائم کرنا یا برقرار رکھنا مشکل ہو۔کمپنی کا کہنا ہے کہ ٹیکنالوجی کو تجارتی، حکومتی، دفاعی، ہنگامی امدادی اور دور دراز علاقوں میں توانائی کی ضروریات پوری کرنے کے لیے استعمال کیا جاسکتا ہے۔
ڈیپلویبل انرجی کا مقصد ایسے نیوکلیئر سسٹمز تیار کرنا ہے جنہیں مستقل طور پر ایک مقام پر تعمیر کرنے کے بجائے منتقل، نصب، چلایا اور ضرورت کے مطابق دوبارہ دوسری جگہ منتقل کیا جاسکے۔
