واشنگٹن ( پاک ترک نیوز)
واشنگٹن میں ایک عشائیے کے دوران اچانک اس وقت ہلچل مچ گئی جب ایک مسلح شخص نے سیکیورٹی اہلکاروں پر فائرنگ کر دی۔ اس موقع پر صدر ڈونلڈ ٹرمپ اسٹیج پر موجود تھے اور ایک معروف جادوگر و ذہنی کرتب دکھانے والے فنکار اوز پرل مین کے ساتھ مصروف تھے۔
اس سنسنی خیز لمحے میں اوز پرل مین اسٹیج پر ایک دلچسپ کرتب پیش کر رہے تھے، جس میں وہ پریس سیکرٹری کیرولین لیوٹ کے ہونے والے بچے کے نام کا اندازہ لگانے کی کوشش کر رہے تھے۔
اوز پرل مین ایک امریکی فنکار ہیں جو اپنے منفرد دماغی کھیل اور حیران کن انداز کی وجہ سے دنیا بھر میں پہچانے جاتے ہیں۔
اس تقریب میں ان کی شمولیت غیر معمولی سمجھی گئی، کیونکہ روایتاً اس عشائیے میں کسی کامیڈین کو مدعو کیا جاتا ہے جو صدر اور صحافیوں پر طنز و مزاح کرتا ہے۔ تاہم، ٹرمپ انتظامیہ اور میڈیا کے درمیان کشیدگی کے باعث اس بار روایت سے ہٹ کر ایک جادوگر کو بلایا گیا۔
تقریب سے قبل ایک کالم میں اوز پرل مین نے اعتراف کیا تھا کہ اس اہم دن کے لیے تیاری کرنا ان کے لیے آسان نہیں تھا۔ انہوں نے کہا تھا کہ گزشتہ 30 سال سے ذہنی کرتب کی مشق دراصل اسی لمحے کے لیے تھی، جب وہ دنیا کی طاقتور ترین شخصیات میں سے ایک، صدر ٹرمپ کے سامنے اپنا فن پیش کریں گے۔
یہ بھی پڑھیں: ایران کے پاس وقت نہیں ،معاہدہ نہ ہوا تو باقی اہداف کو نشانہ بنائیں گے ،ٹرمپ
ان کا یہ بھی کہنا تھا کہ اگر وہ کسی ایک شخص کا ذہن پڑھنا چاہیں تو وہ ڈونلڈ ٹرمپ ہوں گے، کیونکہ آج تک کوئی یہ سمجھ نہیں سکا کہ وہ اگلے لمحے کیا کہیں گے یا کیا سوچیں گے۔ انہوں نے ٹرمپ کو ایک پیچیدہ معمہ قرار دیا تھا جسے حل کرنا ان کی خواہش تھی۔
اوز پرل مین کی یہ خواہش تو پوری ہو گئی کہ وہ صدر کے سامنے پرفارم کر سکیں، لیکن افسوس کہ اس یادگار لمحے کو گولیوں کی آواز نے ادھورا چھوڑ دیا۔
