ٹی 20 ورلڈ کپ میں بڑی پیشرفت، پاکستان کچھ شرائط پر بھارت کیساتھ کھیل سکتا ہے: ذرائع

لاہور : (پاک ترک نیوز)ٹی ٹوئنٹی ورلڈ کپ میں پاکستان اور بھارت کے ممکنہ ٹاکرے سے متعلق اہم پیشرفت سامنے آ گئی ہے۔ انٹرنیشنل کرکٹ کونسل (آئی سی سی) پاکستان کو بھارت کے خلاف میچ کھیلنے پر آمادہ کرنے کیلئے متحرک ہو چکی ہے، تاہم پاکستان نے واضح کر دیا ہے کہ کسی بھی فیصلے کا انحصار قومی مفادات اور حکومتی ہدایات پر ہوگا۔
ذرائع کے مطابق پاکستان کرکٹ بورڈ (پی سی بی) اور آئی سی سی کے درمیان ہونے والے حالیہ مذاکرات کے بعد معاملہ براہِ راست وزیراعظم شہباز شریف تک پہنچا دیا گیا ہے، جو اس حوالے سے حتمی منظوری دیں گے۔
اگر پاکستان کی جانب سے رکھی گئی شرائط تسلیم کی گئیں تو میچ کھیلنے کی راہ ہموار ہو سکتی ہے۔لاہور میں اتوار کی شب کئی گھنٹوں پر محیط مذاکرات کے دوران آئی سی سی کے وائس چیئرمین عمران خواجہ نے چیئرمین پی سی بی محسن نقوی سے تفصیلی ملاقات کی، جس میں پاک بھارت میچ کے سیاسی اور اسپورٹس پہلوؤں پر گفتگو ہوئی۔
اس اجلاس میں متحدہ عرب امارات اور سری لنکا کرکٹ بورڈ کے نمائندے بھی ویڈیو لنک کے ذریعے شریک رہے۔
ذرائع کا کہنا ہے کہ پی سی بی نے آئی سی سی کو دوٹوک مؤقف سے آگاہ کیا کہ فیصلہ حکومت پاکستان کرے گی، جبکہ پاکستان نے اپنی سالانہ آمدن میں اضافے سمیت چند اہم نکات کو مشروط طور پر سامنے رکھا ہے۔
اس دوران بنگلا دیش کرکٹ بورڈ کے صدر امین الاسلام بھی لاہور پہنچے اور اہم مشاورت میں حصہ لیا۔ سری لنکا اور یو اے ای کرکٹ بورڈز نے بھی پاکستان سے اپیل کی ہے کہ وہ اپنے فیصلے پر نظرِ ثانی کرے تاکہ ٹورنامنٹ متاثر نہ ہو۔
ذرائع کے مطابق آئی سی سی نے بھارتی بورڈ کو بھی پیغام دیا ہے کہ کھیل کی روح کے خلاف اقدامات، جیسے ہینڈ شیک تنازعات، سے اجتناب کیا جائے۔ پاکستان کو قائل کرنے کیلئے مختلف تجاویز زیر غور ہیں۔
پی سی بی ذرائع کا مزید کہنا ہے کہ اگر ضرورت پڑی تو چیئرمین پی سی بی محسن نقوی پیر کے روز وزیراعظم شہباز شریف سے ملاقات کر کے صورتحال پر براہ راست بریفنگ دیں گے، جس کے بعد اس حساس معاملے پر حتمی فیصلہ سامنے آ سکتا ہے۔