لاہور(پاک ترک نیوز )وفاقی وزیر پیٹرولیم علی پرویز ملک نے خبردار کیا ہے کہ اگر ملک میں پیٹرول کی قلت پیدا ہوئی تو فی لیٹر قیمت ایک ہزار روپے تک جا سکتی ہے۔
لاہور میں میڈیا سے گفتگو کرتے ہوئے علی پرویز ملک نے کہا کہ فی الحال ملک میں پیٹرول کی کوئی قلت نہیں، تاہم عالمی منڈی میں تیل کی قیمتوں میں 80 فیصد اضافہ ہوا ہے، جبکہ پاکستان میں صرف 50 فیصد اضافہ کیا گیا۔
ان کا کہنا تھا کہ وزیراعظم شہباز شریف نے ذمہ داری کا مظاہرہ کرتے ہوئے پیٹرول کی قیمت کے آگے بند باندھا ہے۔ گزشتہ روز ایک ہی دن میں 18 کروڑ روپے کے ایندھن کے ٹوکن جاری کیے گئے۔
وفاقی وزیر نے کہا کہ تیل کے کنوؤں پر کام شروع ہوچکا ہے اور اکتوبر میں تیل کی دریافت کی امید ہے۔ انہوں نے جماعت اسلامی کو عوام کی تکالیف پر سیاست سے گریز کا مشورہ دیا۔
علی پرویز ملک نے کہا کہ حکومت سردیوں میں گیس کی قلت نہیں ہونے دے گی، جبکہ اسلام آباد پر کسی کو چڑھائی کی اجازت بھی نہیں دی جائے گی۔
