واشنگٹن ( پاک ترک نیوز) امریکی صدر ڈونلڈ ٹرمپ کی جانب سے اسرائیل کو ایران کے خلاف جوابی کارروائی سے گریز کرنے کے مشورے کے باوجود اسرائیل نے ایران کے مختلف علاقوں میں حملے کر دیئے۔
ایرانی میڈیا کے مطابق دارالحکومت تہران، تبریز، اصفہان اور کرج میں دھماکوں کی آوازیں سنی گئیں، جس کے بعد مختلف علاقوں میں سیکیورٹی اور فضائی دفاعی نظام کو ہائی الرٹ کر دیا گیا۔
اسرائیلی فوج نے اپنے بیان میں دعویٰ کیا ہے کہ مغربی اور وسطی ایران میں فوجی اہداف کو نشانہ بنایا گیا۔ اسرائیل کا کہنا ہے کہ یہ کارروائی حالیہ ایرانی حملوں کے جواب میں کی گئی۔
دوسری جانب پاسدارانِ انقلاب نے کہا ہے کہ اسرائیل نے ایران کے اندر بیلسٹک میزائلوں کے ذریعے متعدد اہداف پر حملے کیے ہیں۔
اس سے قبل رات گئے ایران نے بیروت پر اسرائیلی حملوں کے ردعمل میں اسرائیل پر میزائل داغے تھے۔ ایرانی حملوں کے بعد وسطی اسرائیل میں دھماکوں کی آوازیں سنی گئیں جبکہ کئی شہروں میں خطرے کے سائرن بج اٹھے اور شہریوں کو محفوظ مقامات پر منتقل ہونے کی ہدایات جاری کی گئیں۔
اسرائیلی میڈیا کے مطابق فضائی دفاعی نظام نے بیشتر ایرانی میزائلوں کو فضا میں ہی تباہ کر دیا اور فوری طور پر کسی بڑے جانی نقصان کی اطلاع موصول نہیں ہوئی۔
اسرائیل اور ایران کے درمیان حالیہ حملوں اور جوابی کارروائیوں نے مشرقِ وسطیٰ میں کشیدگی کو مزید بڑھا دیا ہے جبکہ عالمی برادری صورتحال پر گہری نظر رکھے ہوئے ہے۔
