کینبرا ( پاک ترک نیوز) آسٹریلیا نے بنگلہ دیش کے خلاف ون ڈے سیریز کے لیے اپنے اسکواڈ میں تین اہم تبدیلیاں کر دی ہیں، جس کے بعد ٹیم کی قیادت اور کمبی نیشن میں بھی رد و بدل سامنے آیا ہے۔
کرکٹ آسٹریلیا کے مطابق کپتان میچل مارش، ٹریوس ہیڈ اور تنویر سنگھا سیریز کے لیے دستیاب نہیں ہوں گے، جس کے باعث اسکواڈ میں نئے کھلاڑیوں کو موقع دیا گیا ہے۔
کرکٹ بورڈ نے جوش انگلس کو کپتان برقرار رکھا ہے، جبکہ اسکواڈ میں ٹوڈ مرفی کو پہلی مرتبہ ون ڈے ٹیم میں شامل کیا گیا ہے۔ اس کے علاوہ اولی پیک بھی ٹیم کو جوائن کریں گے۔
میتھو شارٹ کو اسکواڈ میں برقرار رکھا گیا ہے، جس سے بیٹنگ لائن اپ میں تسلسل رکھنے کی کوشش کی گئی ہے۔
کرکٹ آسٹریلیا کے مطابق کپتان میچل مارش ٹخنے کی انجری کا شکار ہیں، تاہم توقع ہے کہ وہ ٹی ٹوئنٹی سیریز سے قبل ٹیم کو دوبارہ جوائن کر لیں گے۔ٹریوس ہیڈ ذاتی وجوہات کی بنا پر دورے کے لیے دستیاب نہیں ہیں۔
اسی طرح تنویر سنگھا پاکستان کے خلاف حالیہ سیریز میں ہیم اسٹرنگ انجری کا شکار ہوئے تھے، جس کے باعث وہ اس سیریز سے باہر ہو گئے ہیں۔
بنگلہ دیش اور آسٹریلیا کے درمیان تین ون ڈے میچز کی سیریز کا پہلا میچ 9 جون کو ڈھاکا میں کھیلا جائے گا۔
ماہرین کے مطابق اہم کھلاڑیوں کی عدم دستیابی کے باعث آسٹریلوی ٹیم کو سیریز میں نئے کمبی نیشن کے ساتھ میدان میں اترنا ہوگا۔
