اسلام آباد (پاک ترک نیوز ) وزیراعظم محمد شہباز شریف سے ایرانی وزیرِ خارجہ عباس عراقچی اور ایرانی وفد کی ملاقات ہوئی ہے جس میں خطے کی صورتحال اور پاک ایران تعلقات پر تبادلہ خیال،خطے میں قیام امن کے لیے قریبی مشاورت جاری رکھنے پر اتفاق کیا گیا
ملاقات میں نائب وزیرِ اعظم و وزیرِ خارجہ سینیٹر محمد اسحاق ڈار اور چیف آف آرمی اسٹاف و چیف آف ڈیفینس فورسز فیلڈ مارشل سید عاصم منیر بھی وزیرِ اعظم کے ہمراہ ملاقات میں شریک ہوئے۔ اس سے پہلے ایرانی وزیر خارجہ نے فیلڈ مارشل بھی الگ ملاقات کی ،ایرانی سفارتخانہ کے مطابق ملاقات کے دوران خطے کی موجودہ صورتحال پر تبادلہ خیال کیا گیا،پاکستان کے ثالثی کے کردار کو بھی سراہا گیا۔ ۔ملاقات کے دوران دونوں رہنماؤں نے خطے کی مجموعی صورتحال پر تفصیلی تبادلہ خیال کیا۔ اس موقع پر دوطرفہ تعلقات، سکیورٹی تعاون، اور باہمی دلچسپی کے دیگر امور بھی زیر غور آئے۔
یہ بھی پڑھیں : وزیراعظم کی زیر صدارت اجلاس ،اسحاق ڈار کی ایران سے رابطے پر بریفنگ
ذرائع کے مطابق گفتگو میں اس بات پر زور دیا گیا کہ خطے میں پائیدار امن کے لیے باہمی اعتماد، سفارتی رابطوں اور تعمیری کردار کو فروغ دینا ناگزیر ہے۔ایرانی وزیر خارجہ نے پاکستان کے کردار کو سراہتے ہوئے کہا کہ پاکستان نے ہمیشہ مشکل حالات میں مذاکرات اور ثالثی کے ذریعے کشیدگی کم کرنے کی کوشش کی ہے۔ انہوں نے اس امر پر بھی زور دیا کہ موجودہ حالات میں ایسے اقدامات کی ضرورت ہے جو نہ صرف علاقائی استحکام کو یقینی بنائیں بلکہ اقتصادی تعاون کے نئے دروازے بھی کھولیں۔
فیلڈ مارشل عاصم منیر نے اس موقع پر پاکستان کے مؤقف کو واضح کرتے ہوئے کہا کہ ملک خطے میں امن و استحکام کے لیے اپنی ذمہ داریاں پوری کرتا رہے گا۔ انہوں نے اس بات کا اعادہ کیا کہ پاکستان کسی بھی تنازع کے حل کے لیے پرامن ذرائع اور سفارتی کوششوں کو ترجیح دیتا ہے۔ انہوں نے دونوں ممالک کے درمیان برادرانہ تعلقات کو مزید مضبوط بنانے کے عزم کا اظہار کیا۔
