اسلام آباد (پاک ترک نیوز ) پاکستان اور ایران کے مذاکرات کی راہ پھر ہموار ہونے لگی ،ایران نے جنگ بندی مذاکرات سے متعلق نئی تجاویز پاکستان کے حوالے کر دیں
ایران کی سرکاری خبررساں ایجنسی ایرنا کے مطابق ایران نے جمعرات کی شام کو اپنا نیا مذاکراتی مسودہ پاکستان کے حوالے کیا۔
دوسری طرف ایران کی سپریم کورٹ کے چیف جسٹس غلام حسین محسنی نے کہا ہے کہ ایران نے امریکا کے ساتھ کبھی مذاکرات کی میز نہیں چھوڑی ، ہم جنگ کے خواہاں نہیں، لیکن اس سے ڈرتے بھی نہیں۔
چیف جسٹس غلام حسین محسنی نے کہا کہ اگر ہماری عزت کو خطرہ لاحق ہوا تو ہم اپنی عزت کے لیے لڑیں گے، یہ ہماری قوم کا پختہ مؤقف ہے۔اگرچہ ایران نے ہمیشہ مذاکرات کا خیرمقدم کیا ہے، مگر سفارت کاری منطق اور عقل پر مبنی ہوتی ہے۔ ہم کسی قسم کا جبر قبول نہیں کریں گے۔ جو دشمن جارحیت اور دھمکیوں کے ذریعے اپنے مقاصد حاصل نہ کر سکا، وہ مذاکرات کی میز پر بھی حکم چلانے یا مطالبات مسلط کرنے کا حق نہیں رکھتا۔”
چیف جسٹس نے یہ بھی کہا کہ ایران امریکا کے خلاف قانونی کارروائی کرے گا۔ ہم جنگی جرائم کے مرتکب افراد کا تعاقب کریں گے، انہیں سزا دلائیں گے اور ان سے معاوضہ حاصل کریں گے۔
