راولپنڈی : (پاک ترک نیوز)پاک فوج کے شعبۂ تعلقاتِ عامہ، (آئی ایس پی آر) نے تصدیق کی ہے کہ ضلع باجوڑ میں سکیورٹی فورسز اور قانون نافذ کرنے والے اداروں کی مشترکہ چیک پوسٹ پر دہشتگردوں کے حملے میں 11 جوان شہید ہوگئے، جبکہ جوابی کارروائی میں 12 دہشتگرد ہلاک کر دیے گئے۔
ترجمان پاک فوج کے مطابق واقعہ 16 فروری کو پیش آیا، جب دہشتگردوں نے چیک پوسٹ کی حدود میں داخل ہونے کی کوشش کی۔
ڈیوٹی پر تعینات اہلکاروں نے فوری اور مؤثر ردعمل دیتے ہوئے حملہ آوروں کو آگے بڑھنے سے روکا اور شدید فائرنگ کے تبادلے میں متعدد دہشتگردوں کو ہلاک کر دیا۔
بیان میں کہا گیا ہے کہ پسپائی اختیار کرتے ہوئے حملہ آوروں نے بارود سے بھری گاڑی چیک پوسٹ کی بیرونی دیوار سے ٹکرا دی، جس کے نتیجے میں زور دار دھماکا ہوا۔
دھماکے سے چیک پوسٹ کے انفراسٹرکچر کو شدید نقصان پہنچا اور 11 جوان شہید ہوگئے۔
حکام کے مطابق دھماکے کی زد میں آ کر ایک کمسن بچی بھی جاں بحق ہوئی جبکہ خواتین اور بچوں سمیت سات شہری زخمی ہوئے، جنہیں فوری طور پر طبی امداد فراہم کی گئی۔
سکیورٹی فورسز نے علاقے کو گھیرے میں لے کر کلیئرنس اور سرچ آپریشن شروع کر دیا ہے تاکہ کسی بھی ممکنہ سہولت کار یا فرار ہونے والے دہشتگرد کو گرفتار کیا جا سکے۔
بیان میں عزم ظاہر کیا گیا کہ ملک سے دہشتگردی کے مکمل خاتمے تک کارروائیاں بلا تعطل جاری رہیں گی۔حالیہ برسوں میں خیبر پختونخوا خصوصاً سرحدی اضلاع میں دہشتگرد حملوں میں اضافہ دیکھا گیا ہے۔
باجوڑ میں خود کش حملہ : 11 جوان شہید، 12 دہشتگرد ہلاک
