اسلام آباد(پاک ترک نیوز ) پاکستان پیپلز پارٹی کی نائب صدر سینیٹر شیری رحمان نے کہا ہے کہ چیئرمین بلاول بھٹو زرداری کی ہدایت پر اپوزیشن وفد سے ملاقات کی اور انہیں انتخابی اصلاحات کی پارلیمانی کمیٹیوں میں بھرپور شرکت کی دعوت دی ہے۔
اپوزیشن وفد سے ملاقات کے بعد گفتگو کرتے ہوئے شیری رحمان نے کہا کہ بلاول بھٹو زرداری کی ہدایت پر دونوں ایوانوں میں بننے والی انتخابی اصلاحات کی کمیٹیوں میں تمام سیاسی جماعتوں کی شمولیت یقینی بنانے کی کوشش کر رہے ہیں۔
انہوں نے کہا کہ اپوزیشن کو تجویز دی ہے کہ کمیٹیوں میں لازمی شرکت کرے، فعال کردار ادا کرے اور اپنے تحفظات کھل کر سامنے لائے۔
شیری رحمان کا کہنا تھا کہ پارلیمانی کمیٹیاں پارلیمانی امور کا دل ہوتی ہیں، اگر اپوزیشن ان کمیٹیوں میں شریک نہیں ہوگی تو اس کے تحفظات کیسے دور کیے جا سکیں گے۔
انہوں نے کہا کہ ہر دور کے اپنے چیلنجز ہوتے ہیں، پیپلز پارٹی چاہتی ہے کہ اپوزیشن ان تمام قائمہ کمیٹیوں میں بھی واپس آئے جن کا اس نے بائیکاٹ کر رکھا ہے۔
نائب صدر پیپلز پارٹی نے کہا کہ ہم ہر دور میں انتخابی اصلاحات کے لیے میثاق کی بات کرتے آئے ہیں۔
شیری رحمان کے مطابق اپوزیشن رہنماؤں نے ان کی بات خیرسگالی کے جذبے سے سنی اور مشاورت کے بعد جواب دینے کا کہا ہے۔
یہ بھی پڑھیں: نورین نیازی کو سیاسی انتقام کا نشانہ بنایا جا رہا ہے: سلمان اکرم راجہ
انہوں نے مزید کہا کہ اپوزیشن رہنماؤں نے چیئرمین بلاول بھٹو زرداری کا خصوصی شکریہ ادا کیا ہے، امید ہے کہ اپوزیشن ہماری تجاویز کا مثبت جواب دے گی۔
