اسلام آباد(پاک ترک نیوز ) وزیراعظم محمد شہباز شریف اسرائیلی حملے کے خلاف اظہار یکجہتی کے لئے وفد کے ہمراہ ایک روزہ دورے پر قطر پہنچ گئے۔
تفصیلات کےمطابق دوحہ ایئرپورٹ پر قطر کے نائب وزیراعظم و وزیر مملکت برائے دفاع شیخ سعود بن عبد الرحمن بن حسن الثانی نے وزیراعظم شہباز شریف کا استقبال کیا۔
نائب وزیراعظم و وزیر خارجہ محمد اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اور معاون خصوصی طارق فاطمی وزیرِ اعظم کے ہمراہ پاکستانی وفد میں شریک ہیں۔
ترجمان دفتر خارجہ کے مطابق وزیراعظم شہباز شریف قطر پر اسرائیلی جارحیت کے تناظر میں امیر قطر شیخ تمیم بن حماد الثانی، قطری شاہی خاندان اور قطری عوام سے یکجہتی کیلئے دوحہ گئے ہیں۔
دفترخارجہ کا کہنا ہے کہ وزیراعظم دوحہ میں قطری امیر شیخ تمیم بن حماد الثانی سے ملاقات کریں گے، دوران ملاقات دوحہ پر بلاجواز اسرائیلی جارحیت اور بین الاقوامی قوانین کے صریح منافی حملے کے تناظر میں قطری امیر اور قطری عوام سے یکجہتی کا اظہار کریں گے۔
ملاقات میں اسرائیل کے خطے کے مختلف ممالک پر بلاجواز حملوں اور مسلسل جارحیت کے ساتھ خطے میں امن کے قیام کیلئے مشاورت ہوگی۔
واضح رہے کہ قطر اور پاکستان کے مابین دیرینہ تاریخی برادرانہ تعلقات ہیں جو مشترکہ عقیدے اور اقدار پر مبنی ہیں۔
وزیراعظم شہباز شریف اسرائیلی حملے کے خلاف اظہارِ یکجہتی کیلئے قطر پہنچ گئے
