اسلام آباد (پاک ترک نیوز )وزیر دفاع خواجہ محمد آصف نے کہا ہے کہ اسلام آباد کی اپنی اسمبلی یا صوبائی حکومت کا قیام ایک اچھا اقدام ہوگا، دنیا کے کئی دارالحکومتوں میں اس نوعیت کا انتظامی نظام موجود ہے۔
پارلیمنٹ ہاؤس میں میڈیا سے گفتگو کرتے ہوئے خواجہ آصف کا کہنا تھا کہ اگر پہلے مرحلے میں اسلام آباد میں یہ نظام نافذ کیا جاتا ہے تو مستقبل میں دیگر علاقوں میں بھی اس پر عمل درآمد آسان ہو سکتا ہے۔
انہوں نے کہا کہ نئی دہلی میں بھی مکمل طور پر الگ حکومت موجود ہے، جبکہ افغانستان میں بھی متعدد صوبے ہیں، اس لیے نئے صوبوں یا انتظامی یونٹس کے معاملے پر سخت مؤقف اختیار کرنا مناسب نہیں۔
وزیر دفاع کے مطابق یہ اقدام کسی صوبے کے خلاف نہیں بلکہ وفاق کو مزید مضبوط بنانے کا ذریعہ بن سکتا ہے۔ ان کا کہنا تھا کہ نئے صوبوں کے بجائے نئے انتظامی یونٹس کی اصطلاح زیادہ موزوں ہوگی۔
خواجہ آصف نے واضح کیا کہ مسلم لیگ ن یا وزیراعظم کی جانب سے نئے صوبوں کے حوالے سے کسی پیش رفت کا انہیں علم نہیں۔ سندھ حکومت کا صوبوں کے معاملے پر الگ مؤقف اختیار کرنا اس کا حق ہے، تاہم جب کوئی متفقہ فیصلہ ہوگا تو سب کو اسے تسلیم کرنا ہوگا۔
انہوں نے مزید کہا کہ اختیارات نچلی سطح تک منتقل کرنا اور عوام کے مسائل ان کی دہلیز پر حل کرنا عوام کا بنیادی حق ہے۔
