اسلام آباد (پاک ترک نیوز) وزیراعظم محمد شہباز شریف سے وفاقی وزیر امور کشمیر و گلگت بلتستان انجینئر امیر مقام نے ملاقات کی، جس میں آزاد جموں و کشمیر اور گلگت بلتستان سے متعلق مختلف امور پر تفصیلی تبادلہ خیال کیا گیا۔ملاقات کے دوران وفاقی وزیر نے وزیراعظم کو آزاد کشمیر اور گلگت بلتستان میں جاری ترقیاتی منصوبوں، عوامی فلاح و بہبود کے اقدامات اور دیگر اہم امور پر تفصیلی بریفنگ دی۔
انجینئر امیر مقام نے وزیراعظم کو آزاد کشمیر میں حالیہ انتخابات کے انعقاد اور انتخابی عمل کے حوالے سے بھی آگاہ کیا۔وزیراعظم شہباز شریف نے آزاد کشمیر میں انتخابات کے انعقاد اور انتخابی عمل کے حوالے سے انجینئر امیر مقام کی کارکردگی کو سراہا۔
یہ بھی پڑھیں: اسلام آباد میں مقامی حکومت کے نظام کی منظوری
وزیراعظم نے کہا کہ قائد محمد نواز شریف کے وژن اور رہنمائی کے تحت آزاد کشمیر کی ترقی اور عوام کی خوشحالی کے ایجنڈے کو آگے بڑھایا جائے گا۔شہباز شریف کا کہنا تھا کہ آزاد کشمیر اور گلگت بلتستان کے عوام کی فلاح و بہبود، ترقی اور خوشحالی حکومت کی ترجیحات میں شامل ہے۔انہوں نے ہدایت کی کہ دونوں خطوں کے عوام کی بہتری، ترقی اور خوشحالی کے لیے تمام ممکنہ اقدامات جاری رکھے جائیں۔
