اسلام آباد (پاک ترک نیوز )اسلام آباد میں وفاقی وزارتِ منصوبہ بندی کے دفتر میں حکومت اور جماعت اسلامی کے وفود کے درمیان پیٹرولیم لیوی کے خاتمے اور پیٹرول کی بڑھتی قیمتوں کے معاملے پر مذاکرات ہوئے۔
جماعت اسلامی کے وفد کی قیادت لیاقت بلوچ نے کی، جبکہ فراست شاہ، نصراللہ رندھاوا اور دیگر رہنما بھی وفد میں شامل تھے۔
حکومتی وفد کی قیادت وفاقی وزیر منصوبہ بندی احسن اقبال نے کی۔ وفد میں سینیٹر رانا ثناء اللہ، وزیر پیٹرولیم علی پرویز ملک اور بلال اظہر کیانی بھی شریک ہوئے۔
وزارت منصوبہ بندی کے اعلامیے کے مطابق ملاقات میں پیٹرولیم لیوی، پیٹرول کی بڑھتی قیمتوں اور عوام کو ریلیف دینے کے اقدامات پر تفصیلی تبادلہ خیال کیا گیا۔
احسن اقبال نے جماعت اسلامی کی جانب سے پیش کی گئی تجاویز پر کہا کہ حکومت قابلِ عمل تجاویز کا خیرمقدم کرے گی، جبکہ ناقابلِ عمل تجاویز کے حوالے سے وضاحت فراہم کی جائے گی۔
انہوں نے کہا کہ تجاویز پر متعلقہ اداروں سے رائے لی جائے گی، جس کے بعد تین روز میں مذاکرات کا دوسرا دور ہوگا۔
