لاہور( پاک ترک نیوز) ستمبر 2026 کا مکمل چاند، جسے ہارویسٹ مون (Harvest Moon) کہا جاتا ہے، 26 ستمبر کو آسمان پر جلوہ گر ہوگا۔ماہرین فلکیات کے مطابق مکمل چاند 26 ستمبر کو پاکستانی وقت کے مطابق رات تقریباً 9 بج کر 49 منٹ پر مکمل حالت میں ہوگا۔ یہ چاند سورج کے بالکل مخالف سمت میں نظر آئے گا۔ستمبر کا مکمل چاند روایتی طور پر ہارویسٹ مون کہلاتا ہے کیونکہ یہ ستمبر کے اعتدالِ خریفی (September Equinox) کے قریب ترین مکمل چاند ہوتا ہے۔
چاند طلوع ہونے کے ابتدائی وقت مشرقی افق کے قریب خوبصورت زرد اور نارنجی رنگ میں دکھائی دے سکتا ہے۔ زمین کی فضا سے گزرنے والی چاند کی منعکس شدہ روشنی کے باعث یہ رنگ نمایاں ہوتا ہے۔افق سے بلند ہونے کے ساتھ تقریباً ایک گھنٹے میں چاند کا یہ رنگ بتدریج کم ہوجائے گا۔افق کے قریب چاند معمول سے زیادہ بڑا بھی محسوس ہوگا۔ ماہرین کے مطابق یہ دراصل ’’مون الیوژن‘‘ یعنی چاند کا بصری دھوکا ہے، جس میں انسانی آنکھ افق کے قریب موجود چاند کو آسمان کے بلند حصے میں موجود چاند کے مقابلے میں بڑا سمجھتی ہے۔
ہارویسٹ مون کو بعض علاقوں میں کارن مون بھی کہا جاتا ہے، کیونکہ یہ مکئی سمیت موسم گرما کی فصلوں کی کٹائی کے زمانے سے منسوب ہے۔مقامی روایات میں اسے ٹرننگ لیوز مون، فالنگ لیوز مون اور یلو لیف مون جیسے ناموں سے بھی پکارا جاتا ہے، جو خزاں میں درختوں کے پتوں کے رنگ بدلنے کی جانب اشارہ کرتے ہیں۔ ستمبر کا مکمل چاند چین کے روایتی مڈ آٹم فیسٹیول کے ساتھ بھی منسلک ہے۔ یہ تہوار ہزاروں سال پرانی روایات رکھتا ہے اور اس موقع پر خاندان اکٹھے ہوتے ہیں، چاند کی روشنی سے لطف اندوز ہوتے ہیں اور روایتی مون کیکس کھاتے ہیں۔
یہ بھی پپڑھیں: کراچی اور لاہور ایئرپورٹس پر 10 ارب روپے سے جدید فضائی ٹریفک نظام نصب کرنے کا منصوبہ
26 ستمبر کی رات آسمان پر صرف ہارویسٹ مون ہی توجہ کا مرکز نہیں ہوگا۔ چاند کے قریب زحل بھی ستارے کی مانند روشن نقطے کے طور پر دیکھا جاسکے گا۔دوربین کے ذریعے زحل کے مشہور حلقے اور اس کے چند بڑے چاند بھی دیکھے جاسکتے ہیں۔چاند کے آس پاس پیگاسس کا عظیم مربع بھی نمایاں ہوگا، جبکہ صبح سویرے مشتری اور مریخ سمیت دیگر فلکی اجسام بھی آسمان پر دکھائی دیں گے۔
