اسلام آباد ()ملک میں مہنگائی کا بوجھ مزید بڑھ گیا، ہفتہ وار بنیاد پر مہنگائی کی شرح میں 0.99 فیصد اضافہ ریکارڈ کیا گیا، جبکہ سالانہ بنیاد پر مہنگائی بڑھنے کی شرح 11.92 فیصد کی سطح پر پہنچ گئی۔
ادارہ شماریات نے مہنگائی سے متعلق ہفتہ وار رپورٹ جاری کردی، جس کے مطابق ایک ہفتے کے دوران 20 اشیاء کی قیمتوں میں اضافہ، 10 اشیاء میں کمی جبکہ 21 اشیاء کی قیمتیں مستحکم رہیں۔
رپورٹ کے مطابق ایک ہفتے میں بجلی کے نرخ 18.76 فیصد تک بڑھ گئے۔ انڈے 2.02 فیصد، لہسن 1.57 فیصد اور ایل پی جی 1.55 فیصد مہنگی ہوئی۔
اس کے علاوہ مسور کی دال، چکن، واشنگ صابن اور چنے کی دال کی قیمتوں میں بھی اضافہ ریکارڈ کیا گیا۔
دوسری جانب ہفتہ وار بنیاد پر ٹماٹر 13.45 فیصد سستے ہوئے، جبکہ آلو کی قیمت میں 8.33 فیصد کمی ہوئی۔ کیلے 5.66 فیصد، پیاز 2.42 فیصد اور ڈیزل 1.57 فیصد سستا ہوا۔
سالانہ بنیاد پر مہنگائی کی صورتحال بھی نمایاں رہی۔ رپورٹ کے مطابق پیاز کی قیمت میں 115.98 فیصد اضافہ ہوا، جبکہ ایل پی جی 63.97 فیصد اور بجلی 58.59 فیصد مہنگی ہوئی۔
اسی طرح ڈیزل کی قیمت میں سالانہ بنیاد پر 51.80 فیصد اور پٹرول کی قیمت میں 47.49 فیصد اضافہ ریکارڈ کیا گیا۔
گندم کے آٹے کی قیمت بھی ایک سال کے دوران 32.41 فیصد بڑھ گئی۔
تاہم کچھ اشیاء سالانہ بنیاد پر سستی بھی ہوئیں۔ آلو کی قیمت میں 39.21 فیصد، چینی 21.14 فیصد، ٹماٹر 19.81 فیصد جبکہ انڈے 18.40 فیصد سستے ہوئے۔
