لاہور (پاک ترک نیوز)آزاد کشمیر کے نومنتخب وزیراعظم بیرسٹر افتخار گیلانی نے لاہور میں مسلم لیگ ن کی سینئر قیادت سے ملاقات کی۔
جاتی امراء میں ہونے والی ملاقات میں مسلم لیگ ن کے صدر میاں محمد نواز شریف، وزیراعظم شہباز شریف اور وزیراعلیٰ پنجاب مریم نواز شریک ہوئے۔
سپیکر آزاد کشمیر قانون ساز اسمبلی چوہدری طارق فاروق اور رکن اسمبلی عبدالرحمان آرائیں بھی ملاقات میں موجود تھے۔
مسلم لیگ ن کی قیادت نے افتخار گیلانی کو وزارتِ عظمیٰ سنبھالنے پر مبارکباد دی اور نئی حکومت کے لیے نیک خواہشات کا اظہار کیا۔
ملاقات میں آزاد کشمیر کی سیاسی و حکومتی صورتحال، حکومت سازی کے آئندہ مراحل اور کابینہ کی تشکیل پر تفصیلی مشاورت کی گئی۔
نواز شریف نے آزاد کشمیر میں پہلے 100 دنوں کے لیے اصلاحاتی منصوبہ وزیراعظم افتخار گیلانی کے ساتھ شیئر کیا اور عوام کو فوری ریلیف دینے پر زور دیا۔
ن لیگی قیادت نے صحت، تعلیم، صفائی اور انفراسٹرکچر سمیت بنیادی سہولیات کی بہتری کو ترجیح دینے کی ہدایت کی۔
نواز شریف نے آزاد کشمیر میں گڈ گورننس، عوامی خدمت اور ترقیاتی عمل تیز کرنے جبکہ عوامی مسائل ترجیحی بنیادوں پر حل کرنے پر زور دیا۔
افتخار گیلانی نے مرکزی قیادت کا شکریہ ادا کرتے ہوئے یقین دلایا کہ آزاد کشمیر میں عوامی خدمت، تعمیر و ترقی اور عوامی فلاح کا ایجنڈا آگے بڑھایا جائے گا۔
نومنتخب وزیراعظم نے مسلم لیگ ن کی قیادت کے اعتماد پر پورا اترنے اور عوامی توقعات کے مطابق حکومت چلانے کے عزم کا اظہار بھی کیا۔
