لاہور (پاک ترک نیوز )آزاد کشمیر میں تین مرحلوں پر مشتمل عام انتخابات کے بعد حکومت سازی کا مرحلہ اہم ترین مرحلے میں داخل ہوگیا، مسلم لیگ ن کی اعلیٰ قیادت نے حکومت سازی سے متعلق مشاورت تیز کردی۔
ذرائع کے مطابق قائد مسلم لیگ ن میاں محمد نواز شریف اور وزیراعظم پاکستان میاں محمد شہباز شریف کے درمیان لاہور میں اہم ملاقات ہوئی، جس میں آزاد کشمیر میں نئی حکومت کی تشکیل سمیت دیگر اہم امور پر تبادلہ خیال کیا گیا۔
ملاقات سے قبل نواز شریف نے صدر مسلم لیگ ن آزاد کشمیر شاہ غلام قادر سے ٹیلی فونک رابطہ کیا اور حکومت سازی کے معاملات پر مشاورت کی۔ ذرائع کے مطابق ملاقات میں سپیکر، ڈپٹی سپیکر اور اہم وزارتوں کے لیے ممکنہ امیدواروں کے ناموں پر بھی غور کیا گیا۔
ذرائع کا کہنا ہے کہ شاہ غلام قادر آزاد کشمیر کے نئے وزیراعظم کے لیے موسٹ فیورٹ امیدوار ہیں، جبکہ سیکرٹری جنرل مسلم لیگ ن آزاد کشمیر چوہدری طارق فاروق کے نام پر سپیکر کے عہدے کے لیے غور جاری ہے۔
کرنل وقار احمد نور کے نام پر سینیئر وزیر کے عہدے کے لیے بھی مشاورت جاری ہے۔ ذرائع کے مطابق آزاد کشمیر میں حکومت سازی سے متعلق تمام اہم فیصلوں پر نواز شریف اور شہباز شریف کی ملاقات میں حتمی مشاورت متوقع ہے۔
شیڈول کے مطابق 24 اگست کو خواتین کی مخصوص نشستوں اور ٹیکنوکریٹ نشستوں پر انتخابی عمل مکمل ہوگا، جس کے بعد تمام نومنتخب ارکان اسمبلی کی حلف برداری ہوگی۔
25 اگست کو آزاد کشمیر اسمبلی کے سپیکر اور ڈپٹی سپیکر کا انتخاب متوقع ہے، جبکہ 26 اگست کو ربیع الاول کی چھٹی کے باعث وزیراعظم کا انتخاب 27 اگست کو ہونے کا امکان ہے۔
