اسلام آباد (پاک ترک نیوز ) بانی پی ٹی آئی کی اہلیہ بشریٰ بی بی نے 190 ملین پاؤنڈ کیس میں ٹرائل کورٹ کی جانب سے سنائی گئی سزا معطل کرنے اور ضمانت پر رہائی کیلئے آئینی عدالت میں اپیل دائر کر دی ۔
اپیل بیرسٹر سلمان صفدر کی جانب سے دائر کی گئی، جس میں مؤقف اختیار کیا گیا ہے کہ دورانِ قید بشریٰ بی بی آنکھوں کی بیماری میں مبتلا ہوئیں، ان کی آنکھ کی سرجری بھی ہوئی، جبکہ انہیں مناسب طبی سہولیات فراہم نہیں کی گئیں۔
اپیل میں کہا گیا ہے کہ بشریٰ بی بی کو خاتون ہونے اور علالت کے باعث ضمانت دی جائے۔ مزید مؤقف اپنایا گیا کہ انہیں قیدِ تنہائی میں رکھا گیا، جس کے باعث وہ مناسب علاج اور دیکھ بھال سے محروم رہیں۔
یہ بھی پڑھیں:اسلام آباد ہائیکورٹ، بانی اور بشریٰ بی بی کی مبینہ قید تنہائی کیس کی سماعت، جیل ریکارڈ طلب
درخواست میں یہ الزام بھی عائد کیا گیا ہے کہ قومی احتساب بیورو (نیب) جان بوجھ کر سزا معطلی کی درخواستوں پر فیصلے میں تاخیر اور رکاوٹ ڈال رہا ہے۔
واضح رہے کہ اس سے قبل اسلام آباد ہائی کورٹ بانی پی ٹی آئی اور بشریٰ بی بی کی سزا معطلی کی درخواستیں مسترد کر چکی ہے۔
