کراچی (پاک ترک نیوز )کراچی میں میر رضا کیس میں غفلت برتنے پر سابق ایس ایچ او گلستان جوہر کامران قریشی کے خلاف محکمانہ کارروائی کرتے ہوئے انہیں پولیس ملازمت سے برطرف کردیا گیا۔
ایڈیشنل آئی جی کراچی نے سب انسپکٹر کامران قریشی کو نوکری سے برطرف کرنے کے احکامات جاری کردیے۔
میر رضا کی لاش گلستان جوہر بلاک ون سے ملی تھی۔ سابق ایس ایچ او پر الزام تھا کہ وہ جائے وقوعہ پر خود نہیں پہنچے تھے اور کرائم سین کا معائنہ نہیں کیا تھا۔
دوسری جانب گلستان جوہر کے ہیڈ محرر اور ڈیوٹی افسران کے خلاف بھی انکوائری جاری ہے۔
گزشتہ روز سابق ایس ایچ او کامران قریشی جوائنٹ انویسٹی گیشن ٹیم کے سامنے بھی پیش ہوئے تھے، جبکہ سابق ایس ایچ او فیروز آباد اور دیگر افسران کو بھی طلب کیا گیا تھا۔
عدیل افضال اور کامران قریشی نے جے آئی ٹی کے سامنے اپنے اپنے بیانات بھی ریکارڈ کرائے۔
