پاکستان نے بائیکاٹ کیا تو ورلڈ کپ ہل جائے گا: ڈاکٹر نعمان نیاز

لاہور: (پاک ترک نیوز)کرکٹ ایکسپرٹ ڈاکٹر نعمان نیاز نے ایک انٹرویومیں کہا ہے کہ آج کل کرکٹ سے بڑھ کر کوئی سیاست نہیں ہے۔ بی سی سی آئی نے کھیل کو مذاق بنا دیا ہے۔ آئی سی سی ایک سیاسی غلام بن کر رہ گیا ہے۔
ڈاکٹر نعمان نیاز کا کہنا تھا کہ بنگلا دیش بالکل ٹھیک تھا۔ اس نے پرنسپل اسٹیڈ لیا۔ آئی سی سی چیمپئنز ٹرافی 2025ء کا میزبان پاکستان تھا۔ سیکیورٹی ٹیم نے آکر کلیئر کیا تھا کہ پاکستان میں کھیلنے میں کوئی ایشو نہیں ہے۔ لیکن انڈین ٹیم کھیلنے نہیں آئی۔ اور کہا کہ ہم نیوٹرل وینو پر کھیلیں گے۔ آئی سی سی کے بورڈ نے اجازت دی اور انڈیا نے اپنے تینوں میچ یو اے ای میں کھیلے۔ اسی کو بنیاد بنا کر اب پاکستان نے انڈیا جانے سے انکار کیا، تو آئی سی سی سری لنکا میں میچ کروانے پر رضامند ہوا۔
ڈاکٹر نعمان نیاز کا کہنا تھا کہ کولکتہ نائٹ رائیڈرز نے بی سی سی آئی کے کہنے پر مستفیض الرحمان کا کنٹریکٹ ختم کیا۔ انڈیا کے سیاستدانوں اور بیوروکریٹس نے دھمکیاں دیں کہ مستفیض الرحمان انڈیا آیا تو ہم اس کو دیکھ لیں گے، اس سب کے بعد کیسے کہہ سکتے ہیں کہ انڈیا محفوظ ہے۔
ایک سوال کا جواب دیتے ہوئے ڈاکٹر نعمان نیاز نے کہا کہ اگر پاکستان نے ورلڈ کپ کا بائیکاٹ کیا تو کرکٹ کی ڈائنامکس بالکل چینج ہو جائیں گی۔ براڈ کاسٹرز کی چیخیں نکل جائیں گی۔ کیونکہ اگر پاکستان نے ود ڈرا کیا تو یوگینڈا آ جائے گی۔ اب آپ خود سوچ لیں کہ انڈیا بمقابلہ پاکستان یا انڈیا بمقابلہ یوگینڈا۔ براڈ کاسٹر کو اربوں روپے کا نقصان ہو جائے گا۔ پاکستان نے بائیکاٹ کیا تو ورلڈ کپ ہل جائے گا۔ اور آئی سی سی کا دیوالیہ نکل جائے گا۔ پی سی بی فیصلہ لے تو بین لگ سکتا ہے لیکن پاکستانی سرکار نے فیصلہ کیا تو آئی سی سی پاکستانی ٹیم پر بین نہیں لگا سکتی۔