استنبول(پاک ترک نیوز )پاکستان، ترکیہ اور سعودی عرب مکہ ڈیفنس الائنس کے تحت تعاون کو مزید ادارہ جاتی شکل دینے پر اتفاق کیا ہے۔
تینوں ممالک نے سعودی عرب میں مکہ ڈیفنس الائنس کا مستقل سیکریٹریٹ قائم کرنے کا فیصلہ کیا ہے، جبکہ اس کے پہلے سیکریٹری جنرل کا تعلق پاکستان سے ہوگا۔
ترجمان دفتر خارجہ کے مطابق پاکستانی سیکریٹری جنرل تین سال تک سیکریٹریٹ کی سربراہی کریں گے۔
مکہ مشترکہ دفاعی معاہدے کے تحت اسٹریٹجک سیاسی و دفاعی کمیٹی کا پہلا اجلاس استنبول میں منعقد ہوا، جس میں خطے میں پائیدار امن و استحکام کے لیے مشترکہ کوششیں جاری رکھنے کے عزم کا اعادہ کیا گیا۔
تینوں ممالک نے کشیدگی میں کمی اور بحرانوں کے پرامن حل کے لیے کوششیں جاری رکھنے پر بھی اتفاق کیا۔
پاکستان، ترکیہ اور سعودی عرب نے اجتماعی دفاع اور مشترکہ بازداریت کو مزید مؤثر اور مضبوط بنانے کے عزم کا اظہار کیا۔
معاہدے کے تحت تینوں ممالک مشترکہ سرگرمیوں کے ذریعے دفاعی صلاحیتیں اور مسلح افواج کے باہمی رابطے کو مضبوط بنائیں گے، جبکہ دفاعی صنعت، جدید ٹیکنالوجی کی تیاری اور مشترکہ پیداوار میں تعاون بھی بڑھایا جائے گا۔
ترجمان دفتر خارجہ کے مطابق مکہ دفاعی معاہدے پر مؤثر عملدرآمد خطے میں امن، استحکام اور سلامتی کے لیے اہم کردار ادا کرے گا۔
