جے ڈی وینس کو لانے والا جہاز بوئنگ سی 32 اے اتنا اہم کیوں؟

لاہور( پاک ترک نیوز) ایران سے جنگ بندی مذاکرات کیلئے پاکستان آنے والے امریکی وفد نے ایک خصوصی اور انتہائی اہم طیارے میں سفر کیا۔ یہ طیارہ نہ صرف امریکی نائب صدر بلکہ اعلیٰ حکومتی شخصیات کیلئے مخصوص سمجھا جاتا ہے۔
امریکی نائب صدر جے ڈی وینس نے جس طیارے میں پاکستان کا سفر کیا وہ بوئنگ سی 32 اے ہے، جو درحقیقت بوئنگ 757 کی جدید اور خصوصی شکل ہے۔ یہ طیارہ 1998 میں متعارف کروایا گیا تھا اور اسے خصوصی طور پر وی آئی پی ٹرانسپورٹ اور حساس آپریشنز کیلئے ڈیزائن کیا گیا ہے۔
بوئنگ سی 32 اے کو امریکی نائب صدر، خاتون اول، سیکرٹری آف اسٹیٹ، صدر کی کابینہ اور کانگریس کے ارکان کے سفر کیلئے استعمال کیا جاتا ہے۔ اس طیارے میں جدید کمیونیکیشن سسٹمز نصب ہیں جو دورانِ پرواز بھی اعلیٰ سطح کی رابطہ کاری ممکن بناتے ہیں۔
دلچسپ بات یہ ہے کہ یہ طیارہ بعض مواقع پر وی سی 25 اے یعنی ائیر فورس ون کے متبادل کے طور پر بھی استعمال کیا جاتا ہے، جب صدر کا مرکزی طیارہ دستیاب نہ ہو۔
تقریباً 28 سال پرانا ہونے کے باوجود یہ طیارہ آج بھی جدید ٹیکنالوجی سے لیس ہے اور اہم سیاسی و سفارتی مشنز میں کلیدی کردار ادا کر رہا ہے۔