کراچی( پاک ترک نیوز) امیر جماعت اسلامی حافظ نعیم الرحمن نے کہا ہے کہ اگر حکومت نے پیٹرولیم لیوی ختم نہ کی تو اس کے ساتھ مزید مذاکرات نہیں کیے جائیں گے۔ ہمارا صرف ایک مطالبہ ہے کہ پیٹرولیم لیوی ختم کی جائے، حکومت کا مؤقف ہے کہ بجٹ کی وجہ سے لیوی ختم نہیں کی جا سکتی۔کراچی میں میڈیا سے گفتگو کرتے ہوئے حافظ نعیم الرحمن نے کہا کہ پیٹرولیم لیوی کے خاتمے کے لیے ہماری جدوجہد جاری ہے، وزیراعظم شہباز شریف سے ملاقات ہوئی ہے، جس میں وزیراعظم نے مزید ریلیف دینے کے لیے وقت مانگا ہے۔ اس وقت عوام کو کسی پر اعتماد نہیں، جبکہ میڈیا کو بھی کنٹرول میں رکھا گیا ہے۔
انہوں نے کہا کہ ہمارے تمام ٹاؤن چیئرمین کام کر رہے ہیں، سڑکیں تعمیر کی جا رہی ہیں اور اسکولوں کی تعمیر و بحالی کا کام جاری ہے، تاہم کچرا ٹھکانے لگانے کا اختیار بھی یونین کونسل کے چیئرمین کے پاس نہیں ہے۔حافظ نعیم الرحمن کا کہنا تھا کہ فلسطینیوں نے بھرپور مزاحمت کی اور اسرائیل کو شکست سے دوچار کیا، اسرائیلی حملوں میں 80 ہزار فلسطینی شہید کیے گئے۔ کشمیر اور فلسطین کے معاملے پر عالمی ادارے اپنا کردار ادا نہیں کر رہے، جبکہ کشمیر سے متعلق قرارداد کئی سال سے اقوام متحدہ میں موجود ہے۔
یہ بھی پڑھیں: ایل پی جی کی شفاف نیلامی کا نیا نظام، 10 فیصد گیس دور دراز علاقوں کے لیے مختص کرنے کا فیصلہ
انہوں نے مزید کہا کہ ملک میں سیاسی عدم استحکام ہے، موجودہ حکومتیں عوامی نہیں ہیں اور ان کے بقول عوامی رائے مسترد کرکے فارم 47 کے ذریعے حکومتیں بنائی گئی ہیں۔
