اسلام آباد ( پاک ترک نیوز) بجلی صارفین کے لیے بری خبر، ستمبر کی فیول پرائس ایڈجسٹمنٹ کے تحت بجلی 2 روپے 37 پیسے فی یونٹ مہنگی کردی گئی۔ نیپرا نے اضافے کا نوٹیفکیشن جاری کردیا، جس کا اطلاق نومبر کے بجلی بلوں میں ہوگا۔نیپرا کے مطابق بجلی کی قیمت میں اضافہ ستمبر 2026 کی ماہانہ فیول پرائس ایڈجسٹمنٹ کی مد میں کیا گیا ہے۔ اس اضافے کا اطلاق کے الیکٹرک کے صارفین پر بھی ہوگا۔
واضح رہے کہ سینٹرل پاور پرچیزنگ ایجنسی نے ستمبر کی ماہانہ ایڈجسٹمنٹ کے تحت بجلی 2 روپے 56 پیسے فی یونٹ مہنگی کرنے کی درخواست کی تھی، تاہم نیپرا نے 2 روپے 37 پیسے فی یونٹ اضافے کی منظوری دی۔دوسری جانب صنعتی اور زرعی صارفین کے لیے اضافی بجلی استعمال کرنے پر ملنے والے ریلیف میں بھی کمی کا فیصلہ کیا گیا ہے۔نیپرا نے اضافی کھپت کے پیکیج کے تحت فی یونٹ ریلیف 2 روپے 32 پیسے کم کرنے کا فیصلہ وفاقی حکومت کو بھجوا دیا ہے۔ اس فیصلے کے بعد اضافی بجلی کا نرخ 22 روپے 98 پیسے سے بڑھ کر 25 روپے 30 پیسے فی یونٹ ہوجائے گا۔
نیا نرخ نومبر 2026 کے بلنگ مہینے سے نافذ کرنے کی تجویز ہے، جبکہ وفاقی حکومت اس وقت صنعتی اور زرعی صارفین کو اضافی بجلی کے استعمال پر فی یونٹ 11 سے 15 روپے تک ریلیف فراہم کر رہی ہے۔نیپرا کا یہ فیصلہ چیئرمین کے کاسٹنگ ووٹ کے ذریعے ہوا، جبکہ دو ارکان آمنہ احمد اور مقصود انور خان نے اختلافی نوٹ لکھتے ہوئے 25 روپے 30 پیسے فی یونٹ کے نرخ کو بے بنیاد قرار دیا۔
یہ بھی پڑھیں: ٹک ٹاکر مسٹر پتلو کی 10 نومبر تک عبوری ضمانت منظور
یوں ایک جانب عام بجلی صارفین کے لیے فی یونٹ قیمت میں اضافہ کردیا گیا ہے تو دوسری جانب صنعتی اور زرعی صارفین کے اضافی بجلی استعمال کرنے کا ریلیف بھی کم کرنے کی تجویز سامنے آگئی ہے۔
